އުނގޫފާރު ހޮސްޕިޓަލުގެ އާ އިމާރާތުގެ ބިންގާ އަޅައިފި

ރ. އުނގޫފާރު ރީޖަނަލް ހޮސްޕިޓަލުގެ އާ އިމާރާތުގެ ބިންގާ މިއަދު އަޅައިފި އެވެ. ހަތް މަސް ދުވަހުގެ ތެރޭގައި ނިންމަންޖެހޭ އެ އިމާރާތުގެ ބިންގާ އަޅުއްވައިދެއްވީ ހެލްތު މިނިސްޓަރު އަހުމަދު ނަސީމް އަދި ކުރީގެ ހެލްތު މިނިސްޓަރު އަނީސާ އަހުމަދެވެ.

މިއީ ޓާޝަރީ ފެންވަރަށް ހޮސްޕިޓަލް ތަރައްގީކުރުމުގެ މަސައްކަތުގެ ބައެކެވެ. މި މަސައްކަތް ހަވާލުކޮށްފައިވަނީ އެލިއާ ކޮންސްޓްރަކްޝަން ކޮމްޕެނީއާއެވެ. މި މަޝްރޫއަކީ 72 މިލިއަން ރުފިޔާގެ މަޝްރޫއެކެެވެ.

ތިން ބުރިއަށް ހަދާ މި އިމާރާތުގެ ފުރަތަމަ ބުރީގައި 10 އެނދުގެ މަޖެންސީ ރޫމަކާއި ރޭޑިއޮލޮޖީ ޑިޕާޓްމަންޓާއި ސީޓީ ސްކޭނާއި އެކްސްރޭ ދެ ކޮޓަރިއާއި މެމޮގްރަފީ ހިދުމަތާއި އަލްޓްރާ ސައުންޑް ސްކޭނާއި އެމްއާރުއައިގެ ހިދުމަތް ލިބޭނެ އެވެ.

މީގެ އިތުރުން އާ ލެބޯޓްރީއަކާއި އޮޕަރޭޝަން ދެ ތިއޭޓަރު ގާއިމްކުރާނެ އެވެ. އެގޮތުން ދެ ތިއޭޓަރުގެ ތެރެއިން ކަށީގެ އޮޕަރޭޝަންތަކަށް އެއް ތިއޭޓަރު ހާއްސަކުރުމަށް ނިންމާފައިވާއިރު ދެވަނަ ބުރީގައި ފިޒިއޮތެރަޕީ އާއި ޕްރައިވެޓް ނުވަ ކޮޓަރި ހުންނާނެވެ.

އުނގޫފާރު ހޮސްޕިޓަލްގެ އާ އިމާރާތުގެ 3 ބުރީގައިވެސް 169 ފޫޓާއި 74 ފޫޓު ހުންނާނެ އެވެ. އެ ތަނުގައި މިހާރު ބޭނުންކުރަނީ 150 ފޫޓު 60 ފޫޓުގެ ދެ ފްލޯގެ އިމާރާތެކެވެ.