ކުށެއްގެ ތުހުމަތުގައި ފުލުހުންގެ ބަންދުގައި ހުރި މީހަކު އަމިއްލަ ނަފްސަށް ގެއްލުންދޭން އުޅެފި

ކުޅުދުއްފުށީގައި ފުލުހުންގެ ބެލުމުގެ ދަށުގައި ހުރި ފިރިހެނަކު އަމިއްލަ ނަފްސަށް ގެއްލުންދޭ މަސައްކަތްކޮށްފި އެވެ. މިރޭ ގާތްގަނޑަކަށް 19:00 ގައި ހިނގި މިހާދިސާއާ ގުޅިގެން އެ މީހާއަށް ކުޅުދުއްފުށީ ރީޖަނަލް ހޮސްޕިޓަލްގައި ދަނީ ފަރުވާދެމުންނެވެ.

ކޭއޯއަށް މިކަން ކަށަވަރުކޮށްދެއްވަމުން ފުލުހުން ބުނީ އެމީހާއަށް ކުޅުދުއްފުށީ ރީޖަނަލް ހޮސްޕިޓަލްގައި ފަރުވާދެމުންދާ ކަމަށާއި މި ހާދިސާއާ ގުޅިގެން އަޅަން ޖެހޭ ފިޔަވަޅުތައް އަޅައި ބަލަން ޖެހޭ ކަންކަން ފުލުހުން ބަލަމުންދާކަމަށެވެ. އަދި މައްސަލާގެ ބާވަތުން މިކަމުގެ އިތުރު ތަފްސީލެއް ފުލުހުން ނުދެއްވި އެވެ.

މި ހާދިސާއާ ގުޅިގެން ކޭއާރުއެޗުންވެސް މީޑިއަށް މައުލޫމާތުދެއްވަން ބޭނުމެއް ނުވި އެވެ. ކޭއޯއަށް އެނގިފައިވާގޮތުން އަމިއްލަ ނަފްސަށް ގެއްލުންދިނީ ވައްކަމުގެ ތުހުމަތެއްގައި ހުރި 31 އަހަރުގެ ދިވެހި ފިރިހެނެކެވެ.

އަމިއްލަ ނަފްސަށް ގެއްލުންދިނުމަށް އެ މީހާ އުޅުނު ގޮތް ކޭއޯއަށް އެނގިފައިވީނަމަވެސް މިމައްސަލާގެ ބާވަތުން އެކަން ރިޕޯޓްނުކުރުމަށް ވަނީ މިނޫހުން ނިންމާފަ އެވެ.