އައިޑީކާޑު މުއްދަތު ހަމަވިއަސް ވޯޓުލެވޭނެ: އީސީ

ވޯޓު ލާން ދިޔުމުން އެއްވެސް އައިޑީކާޑެއްގެ މުއްދަތު ހަމަވެފައިވާކަމަށް ނުބަލާނެ ކަމަށް އިލެކްޝަން ކޮމިޝަންގެ ރައީސް އަހުމަދު ޝަރީފް ވިދާޅުއްވެއްޖެ އެވެ.

ޝަރީފް މިއަދު ކުރެއްވި ޓްވީޓެއްގައި ބުނެފައިވަނީ މުއްދަތު ހަމަވެފައިވާ އައިޑީކާޑުތައް ޖޫންމަހުގެ ނިޔަލަށް މުއްދަތު އިތުރުކޮށްފައިވާ ކަމަށް ނޭޝަނަލް ރަޖިސްޓްރޭޝަނުން އިއުލާން ކޮށްފައިވާތީ، ވޯޓުލުމުގައި އެއްވެސް އައިޑީ ކާޑެއް މުއްދަތު ހަމަވެފައިވާކަމަށް ނުބަލާނެކަމަށެވެ.

ލޯކަލް ކައުންސިލް އިންތިޚާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ އިންތިޚާބުގައި ވޯޓްލުމުގެ ހައްގު ލިބިގެން ވަނީ 273،128 މީހުންނަށެވެ.

މީގެ ތެރެއިން 5134 މީހުންނަކީ މިމަހުގެ 10ވަނަ ދުވަހާހަމަޔަށް 18 އަހަރު ފުރޭ މީހުންކަމަށް އިލެކްޝަންސް ކޮމިޝަނުން ވަނީ ބުނެފައެވެ. މިއީ އަލަށް ވޯޓުލެވޭ މީހުން އެންމެ ގިނަ އިންތިޚާބުކަންވެސް އީސީންވަނީ ފާހަގަކޮށްފައެވެ.