ލިޔުމެއް ނެތި ޖަމްޝީދު ވޯޓުލާން އުޅުމުން ހޫނުވެއްޖެ

ރަސްމީ އެއްވެސް ލިޔުމެއް ނެތި އެންމެ ފަހު ވަގުތު ކުޅުދުއްފުށީ ދެކުނު ދާއިރާގެ މެމްބަރު ޖަމްޝީދު މުހައްމަދު ވޯޓްލާން އުޅުމުން މައްސަލަ ހޫނުވެއްޖެ އެވެ. ކަރަންޓީނުގެ މީހުންގެ ވޯޓުލުމަށް ހުޅުވާލި ވަގުތުގައި 6 ޖަހަނިކޮށް މެމްބަރު ޖަމްޝީދު ވޯޓުލުމަށް ވަޑައިގަތީ އަފީފުއްދީން ސްކޫލް ކުލާސް ރޫމްގައި ހުރި ފޮއްޓަށެވެ.

ހުޅަނގު ދެކުނު ދާއިރާގެ މި ފޮއްޓަށް ވޯޓުމަށް ޖަމްޝީދު ވަޑައިގެންނެވިއިރު އޭނާގެ އަތުގައި ރަސްމީ އެއްވެސް ލިޔުމެއް ނެތްކަމަށް އެ ސަރަހައްދުގައި ހަރަކާތްތެރިވާ ކޭއޯގެ މޮނިޓާ ޝާމިލް އަލީ މައުލޫމާތު ދެއްވި އެވެ. ޖަމްޝީދު ވޯޓްލެއްވުމަށް ވަޑައިގެންނެވީ އައިކާޑުގެ ފޮޓޯއެއް ފޯނުން ދައްކައިގެންނެވެ.

އެކަމަކު އެކަން ވޯޓްލާން މަރުކަޒުގެ ވެރިޔާ ދެކޮޅު ހެއްދެއްވުމުން މީހަކަށް ގުޅައިގެން އައިޑީކާޑް ގެނެސްގެން ވޯޓް ލެއްވިކަމަށް ޝާމިލް ވިދާޅުވި އެވެ. ފުރަތަމަ ލިޔުމެއް ނެތި ވޯޓުލުމަށް މަރުކަޒަށްވެސް އޭނާ ވެންދެވި އެވެ. އެކަމާ ގުޅިގެން އިދިކޮޅު ކެންޑިޑޭޓުންގެ މަންދޫބު ނުރުހުންފާޅުކޮށް އަޑުގަދަވެސް ކުރި އެވެ.

އެކަމަކު ފަހުން އޭނާ އައިޑީކާޑު ގެނެސް ވޯޓްލުމުން މައްސަލަ ވަނީ ހައްލުވެފަ އެވެ.