ކެމިސްޓްރީ ޕޭޕަރުވެސް ލީކު ވެއްޖެ

އިތުރު ސުވާލު ކަރުދާހެއް ލީކުނުވާނެކަމުގެ ޔަގީންކަން އެޑެކްސެލްއިން ދީފައިވަނިކޮށް ކެމިސްޓްރީ ޕޭޕަރު މިއަދު ލީކު ވެއްޖެ އެވެ.

ލީކުވެފައި ވަނީ މިއަދު 1:30ގައި ރާއްޖޭގައި އޮންނަ ކެމިސްޓްރީ ޔުނިޓް 2ގެ ޕޭޕަރެވެ. އެ ޕޭޕަރު މިހާރު އަންނަނީ އެކި ޕްލެޓްފޯމުތަކުގައި ދައުރުކުރަމުންނެވެ. މިދިޔަ ހަފްތާގައި ހެދި ފިޒިކްސް އަދި ބަޔޮލޮޖީ ޕޭޕަރު ވަނީ ލީކުވެފަ އެވެ.

މިއަދު ކެމިސްޓްރީ ޕޭޕަރު ލީކުވެފައި ވާއިރު، މިއަދުން ފެށިގެން އެ މައްސަލަ ދިމާނުވާނެ ކަމުގެ ވަރަށް ބޮޑު ޔަގީންކަމެއް އިއްޔެ އެޑެކްސެލް އިން ވަނީ ދީފަ އެވެ.

އެޑިއުކޭޝަނުން ބުނީ އެ ޕޭޕަރުތައް ލީކުވެފައި ވަނީ ރާއްޖޭގެ ސެންޓަރަކުން ނޫން ކަމަށެވެ. ޕޭޕަރުތައް ލީކުވީ ބައެއް ގައުމުތަކުގައި އިމްތިހާނު ހަދާ ވަގުތާއި ރާއްޖޭގައި އިމްތިހާނު ހަދާ ވަގުތުގައި ތަފާތުތަކެއް ހުރުމުންނެވެ. ޕޭޕަރު ލީކުވާ މައްސަލާގައި އެޑިއުކޭޝަން މިނިސްޓްރީން އަންނަނީ އެޑެކްސެލް އާއެކު މަޝްވަރާ ކުރަމުންނެވެ. އަދި ލީކުވި ޕޭޕަރުތައް އަލުން ހެދުމަށް އެޑިއުކޭޝަނުން ވަނީ ހުށަހަޅައިފަ އެވެ.