ޝައުނާ އެންވަޔަރަމަންޓަށް، ޑރ. ހުސެއިން ފިޝަރީޒް މިނިސްޓަރުކަމަށް

ރައީސް އޮފީހުގެ ޕޮލިސީ ސެކްރެޓަރީ އާމިނަތު ޝައުނާ އެންވަޔަމަންޓް މިނިސްޓަރުކަމަށް އަދި ތިމާވެއްޓާ ބެހޭ މިނިސްޓަރުކަމުގައި ހުންނެވި ޑރ. ހުސެއިން ރަޝީދު ހަސަން ފިޝަރީޒް މިނިސްޓަރުކަމަށް އައްޔަނުކުރައްވައިފި އެވެ.

ރައީސް އޮފީހުގައި ދެންމެ ބޭއްވި ރަސްމިއްޔާތެއްގައި މި ދެ ބޭފުޅުންނަށް ވަނީ ވަޒީރުކަމުގެ ފަތްކޮޅު އަރުވާފަ އެވެ.

ރައީސް އޮފީހުގެ ތަރުޖަމާނު މަބްރޫކް އަޒީޒް ކުރެއްވި ޓްވީޓުގައި ވިދާޅުވީ، ހިދުމަތްތައް ރަނގަޅުކޮށް ވައުދުތައް ފުއްދުމަށް ސަރުކާރުގެ އިސްމަގާމުތަކަށް ބަދަލުތަކެއް ގެނެސްފައިވާ ކަމަށެވެ.

ޓެކްނޮލޮޖީ މިނިސްޓްރީގެ ވަޒީރަކަށް މިހާތަނަށް ހުންނެވީ ޖުމްހޫރީ ޕާޓީގެ ސްލޮޓްގައި އެ މަގާމަށް ގެންނެވި މުހައްމަދު މަލީހް ޖަމާލެވެ. ނަމަވެސް ރައްޔިތުންގެ މަޖިލީހުން އޭނާ މަގާމުން ވަކިކުރުމާ ގުޅިގެން އެ މިނިސްޓްރީގެ ވަޒީރުކަމުގައި މިހާތަނަށް ބޭފުޅަކު ނެތެވެ.

މި ސަރުކާރު އުފެދުމާއެކު ފިޝަރީޒް މިނިސްޓަރުކަމުގައި މިހާތަނަށް ހުންނެވީ އެމްއާރުއެމް ސްލޮޓުގައި ހުންނެވި ޒަހާ ވަހީދެވެ. އެ މަގާމުން އޭނާ ވަކިކުރެއްވުމަށްފަހު ބަދަލުކުރެއްވީ ރައީސް އޮފީހަށެވެ. އެހެންނަމަވެސް އެއީ ކޮން މަގާމަކަން އަދި ޔަގީން ކުރެވިފައެއް ނުވެ އެެވެ.