ރާއްޖެއަށް 200 އަށްވުރެ ގިނަ ޑޮކްޓަރުންނާއި ނަރުހުން ހޯދަން އިއުލާންކޮށްފި

ރާއްޖެއަށް 200 އަށް ވުރެ ގިނަ ޑޮކްޓަރުން ހޯދަން ހެލްތު މިނިސްޓްރީން އިއުލާން ކޮށްފި އެވެ. ޑޮކްޓަރުން ހޯދުމުގެ މަސައްކަތް ހެލްތު މިނިސްޓްރީން ހަވާލު ކޮށްފައި ވަނީ އިންޑިޔާގެ ރެކްރޫޓިން އެޖަންސީއެއް ކަމަށްވާ "ނޮރްކާ ރޫޓްސް" އާއެވެ.

އެޖެންސީން ވަނީ ރާއްޖެއަށް އެކި ދާއިރާތަކުގެ 110 ސްޕެޝަލިސްޓުންނާއި 100 މެޑިކަލް އޮފިސަރުން ހޯދަން ވަނީ އިއުލާން ކޮށްފަ އެވެ. އޭގެ އިތުރުން 150 ނަރުހުންނާއި 20 ޑެންޓިސްޓުންނާއި އަދި 10 ރޭޑިއޮގްރަފަރާއި 10 ފިޒިއޮތެރަޕިސްޓުން ހޯދަން ވަނީ އިއުލާން ކޮށްފަ އެވެ.

ސްޕެޝަލިސްޓް ޑޮކްޓަރުންގެ މުސާރައެއް ގޮތުގައި ކަނޑައަޅާފައި ވަނީ އެލަވަންސްތަކާ ނުލާ މަހަކު 45،319ރ. އެވެ. އަދި މެޑިކަލް އޮފިސަރުންނާއި ޑެންޓިސްޓުންނަށް 23،345ރ. ކަނޑައަޅާފައިވާ އިރު ނަރުހުންނަށް 14،417 ރ. ގެ މުސާރައެއް ދިނުމަށް ވަނީ ކަނޑައަޅާފަ އެވެ.

އެ މަގާމްތަކަށް ކުރިމަތިލުމަށް ބޭނުންވާ ޝަރުތުތަކުގެ ތެރޭގައި މަދުވެގެން ދެ އަހަރުގެ ތަޖުރިބާ އޮތުމާއި އުމުރުން 50 އަހަރުން ދަށްވުން ހިމެނެ އެވެ.

އެގޮތުން މި މަގާމުތަކަށް މި މަހު 15 ގެ ކުރިން އެދި ހުށަހަޅަން ޖެހެ އެވެ. އަދި ވަރަށް އަވަހަށް އިންޓަވިއުތައް ފަށާނެ ކަމަށް އެ އިއުލާނުގައި ބުނެފައިވެ އެވެ.