ދިއްދޫގައި ހަލުވިކަމާއެކު ބަލި ފެތުރެނީ، ވޮލެންޓިއަރުން ހޯދުމަށް އިއުލާނުކޮށްފި

ދިއްދޫގައި ހަލުވިކަމާއެކު ކޮވިޑް ފެތުރެމުންދާއިރު އެރަށުގެ ޓާސްކްފޯސްއަށް ވޮލެންޓިއަރުންގެ ގޮތުގައި އެހީތެރިވާން ބޭނުންވާ ފަރާތްތަކަމަށް އެފުރުސަތު ހުޅުވާލައިފި އެވެ.

އެރަށު ކައުންސިލުން މިއަދު ކުރި އިއުލާނެއްގައި ބުނެފައިވަނީ ކޮވިޑް ފެތުރުން ކުޑަކުރުމުގެ ގޮތުން އަޅާ ފިޔަވަޅުތައް ތަންފީޒްކުރުމަށް ދިއްދޫ ޓާސްކްފޯހަށް އެހީތެރިވެދޭނެ ވޮލެންޓިއަރުން ބޭނުންވާ ކަމަށާއި، އެކަމަށް ޝައުގުވެރިވާ ފަރާތްތަކުން މާދަމާގެ ކުރިން އެފަރާތެއްގެ ނަމާއި އެޑްރެސް، އައިޑީކާޑު ނަންބަރާ ގުޅޭ ފޯން ނަންބަރެއް އެ ކައުންސިލްގެ ހޮޓްލައިން 7285567 އަށް ފޮނުވުމަށެވެ.

އެރަށުން އިއްޔެވެސް އިތުރު 12 މީހުން ޕޮޒިޓިވްވެފައިވާއިރު މިހާރު އެރަށުގެ ޕޮޒިޓިވް ކޭސްތަކުގެ އަދަދު ވަނީ 57 އަރާފައެވެ. އެރަށުން ޖުމްލަ ނެގުނު 381 ސާމްޕަލުތަކުގެ ތެރެއިން 293 ސާމްޕަލް ނެގެޓިވެފައިވާއިރު މިހާތަނަށް ނަތީޖާ ނުލިބޭ 35 ސާމްޕަލެއް ހިމެނެއެވެ. ފަހުން ޕޮޒިޓިވްވި މީހުންގެ ކޮންޓެކްޓް ޓްރޭސިންގެ ތެރެއިން 52 މީހަކު ޑައިރެކްޓް ކޮންޓެކްޓްގެ ގޮތުގައި ފާހަގަކުރެވިފައިވާއިރު 167 ގެޔެއް ވަނީ ކަރަންޓީން ކޮށްފައެވެ.