ގަދަފަދަ ޖަރުމަނުގެ މައްޗަށް ކުރިހޯދައި އިންގްލޭންޑް ކުއާޓާ ފައިނަލަށް

ޔޫރޯ ފުޓްބޯޅަ މުބާރާތުގައި މިރޭ ލަންޑަނުގެ ވެމްބްލީ ޖަރުމަނުގެ މައްޗަށް 2 - 0 ން ހޯދި މޮޅާއެކު އިންގްލޭންޑް ކުއާޓާ ފައިނަލަށް ދަތުރުކޮށްފި އެވެ.

މިމެޗުގައި ގިނައިރު ބޯޅަ ހިފަހައްޓައިގެން ކުޅުނު ޖަރުމަނުން ވަނީ މުޅި މެޗުގައި އިންގްލޭންޑްގެ ގޯލާ އަމާޒުކޮށް 3 ހަމަލާއެއް ފޮނުވާލާފަ އެވެ. އަދި އިންގްލޭންޑުން ވަނީ 4 ހަމަލާއެއް ފޮނުވާލާފަ އެވެ. މެޗުގެ ފުރަތަމަ ހާފުގައި ޖަރުމަނަށް ވަނީ ލަނޑު ޖަހަން ރަނގަޅު ފުރުސަތެއް ލިބި ބޭކާރުވެފަ އެވެ. އެޓީމުގެ ޓިމޯ ވާނާ ފޮނުވާލި ބޯޅަ އިންގްލޭންޑްގެ ކީޕަރު ޖޯޑަން ޕިކްފޯޑް ވަނީ މަތަކޮށްފަ އެވެ.

އިންގްލޭންޑަށް ވެސް ވަނީ ފުުރަތަމަ ހާފުގައި ލަނޑު ޖަހަން ވަރަށް ރަނގަޅު ފުރުސަތުތަކެއް ލިބިފަ އެވެ. އެގޮތުން އެންމެ ފާހަގަކޮށްލެވެނީ ރަހީމް ސްޓާލިން އޭރިއާ ބޭރުގައި ހުރެފައި ފޮނުވާލި ހަމަލާ އެވެ. މިޝޮޓު ޖަރުމަނުގެ ކީޕަރު މެނުއަލް ނޯޔާ ވަނީ ދިފާއުކޮށްފަ އެވެ. މެޗުގެ ފުރަތަމަ ހާފު ނިމުނީ ދެޓީމުންކުރެ އެއްވެސް ޓީމަކަށް ލަނޑެއް ނުޖެހި އެވެ.

މެޗުގެ ދެވަނަ ހާފުގެ 75 ވަނަ މިނިޓްގައި ގްރީލިޝް ދިން ބޯޅައަކުން ލޫކް ޝޯ ނަގައިދިން ހުރަސް ސްޓާލިން ވަނީ ގޯލުގެ ތެރެއަށް ފޮނުވާލައިގެން މެޗުގައި އިންގްލޭންޑަށް ލީޑު ނަގައިދީފަ އެވެ. އޭގެ ފަސްވަރަކަށް މިނެޓުފަހުން މެޗުގެ ނަތީޖާ ހަމަކޮށްލަން ތޯމަސް މުލާއަށް ވަނީ ރަނުގެ ފުރުސަތެއް ލިބިފަ އެވެ. ނަމަވެސް މުލާ ފޮނުވާލި ބޯޅަ ވަނީ ގޯލާ އަމާޒުނުވެފަ އެވެ. މިބޯޅަ ދިޔައީ ގޯލުގެ ދަނޑިކައިރިން ބޭރަށެވެ.

މެޗުގައި އިންގްލޭންޑްގެ ދެވަނަ ލަނޑު އެޓީމަށް ކާމިޔާބުކޮށްދިނީ ކެޕްޓަން ހެރީ ކޭން އެވެ. މެޗުގެ 87 ވަނަ މިނިޓްގައި ގްރީލިޝް ނަގައިދިން ހުރަަހަކުން ކޭން މި ލަނޑު ޖެހީ ބޮލުންނެވެ. މިމެޗަކީ ޖަރުމަނުގެ ކޯޗު ޔަކީމް ލޯ އެ ޓީމަށް ކޯޗުކަން ކޮށްދިން ފަހު މެޗެވެ. ޔޫރޯއަށްފަހު ޓީމު ދޫކޮށްލާނެ ކަމަށް ބުނި ލޯ ވަނީ ޖަރުމަނަށް 15 އަހަރު ކޯޗުކަން ކޮށްދީފައެވެ. މިމެޗުން ބަލިވެ ޖަރުމަނު މުބާރާތާއި އަލްވަދާއުކީއިރު ކުއާޓާ ފައިނަލުގައި އިންގްލޭންޑް ނުކުންނާނީ މިރޭ ސްވިޑަންއާއި ޔޫކްރޭން ބައްދަލުކުރާ މެޗުން މޮޅުވާ ޓީމަކާ ދެކޮޅަށެވެ.