ޒުވާން ޕެޑްރީގެ އާދަޔާ ހިލާފު ކުޅުން

މި ފަހަރުގެ ޔޫރޯގައި އާދަޔާ ހިލާފު ތަފާތު މޮޅު ކުޅުމެއް ދައްކާ އެންމެ މޮޅު ޒުވާން ކުޅުންތެރިޔާގެ މަގާމު ސްޕެއިނުގެ އުމުރުން 18 އަހަރުގެ ޕެޑްރީ ގޮންޒާލޭޒް ހޯދާފި އެވެ.

ސްޕެއިންގެ ހުރިހާ މެޗެއްގައި ޕެޑްރީ ކުޅުނުއިރު މުޅި މުބާރާތުގައި އޭނާ އަށް ގެއްލުނީ ގާތްގަނޑަކަށް އެންމެ މިނިޓެކެވެ. ސްވިޒަލެންޑާ ދެކޮޅަށް ކުޅުނު ކުއާޓާ ފައިނަލުގެ މެޗުގެ އިތުރު ވަގުތުގައި އޭނާ ވަނީ ބަދަލުކޮށްފަ އެވެ.

ޔޫރޯގެ ކުރިން ޕެޑްރީ ސްޕެއިން ޓީމަށް އެންމެ ހަތަރު މެޗު ކުޅުން ޕެޑްރީ މި މުބާރާތުގައި ހުރިހާ މެޗެއްގައި ވެސް އެއް ލެވަލެއްގެ ކުޅުމެއް ދައްކަލާ މިވަނީ އެންމެން އަންތަރީސްކޮށްލާފަ އެވެ. އޭނާގެ ކުޅުމަށް ތައުރީފުކޮށް ސުޕެއިންގެ ކޯޗު ލުއިސް އެންރީކޭ ވެސް ވަނީ ވާހަކަ ދައްކާފަ އެވެ.

"

"ހާލަތު ކިޔައިދިނުމަށް ވުރެ ލޮލަށް ފެންނަ މަންޒަރުތަކަށް ބަލަމާ. ޕެޑްރީ އަކީ މުޅިން ތަފާތު ކުޅުންތެރިއެއް. ފުޓްބޯޅައިގައި މި ފަހުން އަހަންނަށް ފެނުނު އެންމެ ވިސްނުން ތޫނު ހުނަރުވެރި ކުޅުންތެރިޔާ. އަހަންނަށް އަބަދުވެސް އޭނާ ފެންނަނީ ވަރަށް ތާޒާކޮށް. ކޮންމެ ޗެލެންޖެއް ވެސް ޝައުގުވެރިކޮށް ނަގާ ކުޅުންތެރިއެއްގެ ގޮތުގައި."

ސުޕެއިންގެ ކޯޗު، ލުއިސް އެންރީކޭ

މި ފަހަރުގެ ޔޫރޯ ސްކޮޑުގައި ހިމެނި ޕެޑްރީ ގްރޫޕް ސްޓޭޖުގައި ސްޕެއިން ކުޅުނު ހުރިހާ މެޗެއްގައި ކުޅެފައި ވާއިރު އޭނާގެ ފަރާތުން ވަނީ ތަފާތު މޮޅު ކުޅުމެއް ފެނިގެންގޮސްފަ އެވެ.