ތަފާތު މޮޅު ކުޅުމަކާއެކު އިޓަލީ ސެމީއަށް

ޔޫރޯ ފުޓްބޯޅަ މުބާރާތުގައި މިރޭ ދުނިޔޭގެ ރޭންކިންގްގެ އެއްވަނައިގައި އޮތް ބެލްޖިއަމް ކަޓުވާލުމަށްފަހު އިޓަލީން މުބާރާތުގެ ސެމީ ފައިނަލަށް ދަތުރުކޮށްފި އެވެ. ޖަރުމަނުގެ އެލިއަންޒް އެރީނާގައި ކުޅެވުނު މިމެޗު ކާމިޔާބުކުރީ 2 - 1 ން އިޓަލީ އެވެ.

މެޗުގެ 13 ވަނަ މިނެޓުގައި ލިއޮނާޑޯ ބޮނޫޗީ ވަނީ އިޓަލީއަށް ލަނޑެއް ޖަހައިދީފަ އެވެ. ނަމަވެސް ވީއޭއާރް ބެލުމަށްފަހު ރެފްރީ ނިންމީ ބޯޅަ ލިބުނީ އޮފްސައިޑްގައި އޮތް އެޓީމުގެ ޖިއޮވާނީ ޑި ލޮރެންޒޯ ފައިގައި ޖެހިފައިވާ ކަމަށެވެ. އެހެންކަމުން އެލަނޑު ބަލައިނުގަންނަ ކަމަށެވެ. އޭގެފަހުން ބެލްޖިއަމްްއިން ފޮނުވާލި ނުރައްކާތެރި ހަމަލާތައް ޑޮންނަރުންމާ ވަނީ ދިފާއުކޮށްފަ އެވެ.

މެޗުގައި އިޓަލީގެ ފުރަތަމަ ލަނޑު ފެނިގެން ދިޔައީ 31 ވަނަ މިނެޓުގަ އެވެ. މާކޯ ވެރާޓީ ޖައްސާލި ބޯޅަ ގޯލަށް އަމާޒުކޮށްލައިގެން ނިކޯލޯ ބަރޭލާވަނީ މެޗުގައި އެޓީމަށް ފުރަތަމަ ފަހަރަށްލީޑު ނަގައިދީފަ އެވެ. 44 ވަނަ މިނެޓުގައި އޭރިއާ ބޭރުން ފޮނުވާލި ހަމަލާއެއް ވަނީ ގޯލުގެ ކަނަށް ވައްދައިލައިގެން އިޓަލީން ލީޑު ފުޅާކޮށްފަ އެވެ. އިޓަލީއަށް މިލަނޑު ޖަހައިދިނީ ލޮރެންޒޯ އިންސީނިއޭ އެވެ.

ބެލްޖިއަމުން މިރޭ މެޗުގެ ފުރަތަމަ ހާފު ނިމެން އުޅެނިކޮށް ވަނީ ލަނޑެއް ޖަހާފަ އެވެ. ޑޮކޫ އަށް ކުރި ފައުލަކާ ގުޅިގެން ރެފްރީ ވަނީ ބެލްޖިއަމަށް ޕެނަލްޓީއެއް ދީފަ އެވެ. ލުކާކޫ ވަނީ ބޯޅަ ގޯލުގެ ތިރީކަނަށް ފޮނުވާލައިން ލަނޑެއް ކާމިޔާބުކޮށްފަ އެވެ. މެޗުގެ 60 ވަނަ މިނެޓުގައި ލުކާކޫއަށް ވަނީ ލަނޑު ޖަހަން ރަނގަޅު ފުރުސަތެއް ބޭކާރުވެފަ އެވެ. ނަމަވެސް ސްޕިނަޒޮއްލާ ވަނީ މިހަމަލާ ބްލޮކްކޮށްފަ އެވެ.

މިމޮޅާއެކު ސެމީ ފައިނަލުގައި އިޓަލީ ނުކުންނާނީ ސްވިޒަލޭންޑް ބަލިކޮށް ކުއާޓާއަށް ދަތުރުކުރިއަށް ސުޕެއިނާ ދެކޮޅަކަށެވެ. މިމެޗުންވީ މޮޅާއެކު އިޓަލީން ވަނީ ޖެހިޖެހިގެން އެންމެ ގިނަ މެޗު މިމުބާރާތުގައި ކާމިޔާބުކުރި ޓީމަށެވެ. ސުޕެއިނާ އިޓަލީ ބައްދަލުކުރާ މެޗު އޮތީ މި ޖުލައިގެ މަހުގެ 7 ވަނަ ދުވަހުގެ ރެއެވެ.