ބުރެޒިލާއި އާޖެންޓީނާގެ ފައިނަލެއް

ކޮޕަ އެމެރިކާ ފުޓްބޯޅަ މުބާރާތުގައި ސެމީ ފައިނަލުގައި މިއަދު ޕެނަލްޓީ ޖަހައިގެން ކޮލަމްބިއާ ބަލިކޮށް އާޖެންޓީނާ މުބާރާތުގެ ފައިނަލުން ފުރުސަތު ހޯދައިފި އެވެ.

މިއަދުގެ މެޗުގައި ފުރިހަމަ ވަގުތު ހަމަވިއިރު 1 - 1 ން އެއްވަރުވެފައި އޮތުމުން ނަތީޖާ ނެރެން ޖެހީ ޕެނަލްޓީ އެވެ. މިފަހަރުގެ މުބާރާތުގެ ގަވައިދުގައިވާ ގޮތުން ފުރިހަމަ ވަގުތު ހަމަވާއިރު އެއްވަރުވެފައިވާނަމަ އިތުރު ވަގުތުގެ ދެހާފު ނުކުޅެ ޕެނަލްޓީ ޖަހާނެ އެވެ. މެޗުގެ ފުރަތަމަ ލަނޑު ފެނިގެންދިޔައީ 7 ވަނަ މިނެޓުގައި އާޖެންޓީނާގެ ފަރާތުންނެވެ. އޭރިއާތެރެއިން މެސީ ހުސްކޮށްލާފައި ޖައްސާލި ބޯޅަ ލައުޓާރޯ މާޓިނޭޒް ވަނީ ގޯލުގެ ތެރެއަށް ފޮނުވާލާފަ އެވެ.

ކޮލަމްބިއާއިން މެޗުގެ ނަތީޖާ ހަމަކުރި ލަނޑު 60 ވަނަ މިނެޓުގައި އެޓީމުގެ އެޑްވިން އޭރިއާތެރެއަށް ޖައްސާލި ބޯޅަ ހޯދައި ލުއިސް ޑިއާސް ވަނީ ގޯލުގެ ދުރުކަނަށް އަމާޒުކޮށްލާފަ އެވެ. އޭގެ އިރުކޮޅެއްފަހުންވެސް އާޖެންޓީނާއަށް ވަނީ މެޗުގައި ލީޑު ނަގަން ރަނގަޅު ފުރުސަތެއް ލިބި ބޭކާރުވެފަ އެވެ. މެސީ ފޮނުވާލި ބޯޅަ އަމާޒުވީ ގޯލުގެ އަރިމަތީ ދަނޑިއަށެވެ.

އާޖެންޓީނާ އެންމެ ފަހުން ކޮޕާ އެމެރިކާ ފުޓްބޯޅަ މުބާރާތް ކާމިޔާބުކުރީ 1993 ވަނަ އަހަރު އެވެ. މިފަހަރުގެ ފައިނަލުގައި ބުރެޒިލާ އާޖެންޓީނާ ބައްދަލުކުރާ މެޗު ކުޅެވޭނީ މިމަހުގެ 11 ވަނަ ދުވަހު އެވެ.