ރާއްޖޭއިން ބޭރުން އަންނަ ފަރާތްތަކަށް މީހުން ދިރިއުޅޭ ގެތަކުގައި ކަރަންޓީނެއް ނުވެވޭނެ!

ރާއްޖޭން ބޭރުން ރާއްޖެ އަށް އަންނަ މީހުން، މީހުން ދިރުއުޅޭ ގެތަކުގައި ކަރަންޓީނުވުން މަނާކޮށްފިއެވެ.

ކޮވިޑާ ގުޅިގެން އަޅާފައިވާ ފިޔަވަޅުތަކަށް ދިން ލުއިތަކާ ގުޅޭ މައުލޫމާތު ހާމަކުރުމަށް ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި އެ އޮފީހުގެ ތަރުޖަމާން މުހައްމަދު މަބްރޫކު އަޒީޒު ވިދާޅުވީ އަމިއްލަ ކުންފުނިތަކަށް ރާއްޖޭން ބޭރުން އަން މުވައްޒަފުން ކަރަންޓީނު ކުރެވޭ ގޮތަށް ލުއި ދީފައިވާ ކަމަށެވެ.

ނަމަވެސް އެގޮތަށް ކަރަންޓީނު ކުރެވޭނީ ކަރަންޓީނު ފެސިލިޓީތަކުގައި ކަމަށާއި އެ ފެސިލިޓީތައް ހުންނަންވާނީ ހެލްތު ޕްރޮޓެކްޝަން އެޖެންސީ (އެޗްޕީއޭ)ގެ ހުއްދަދީފައިވާ ތަންތަނުގެ ގޮތުގައި ކަމަށްވެސް ވިދާޅުވިއެވެ. އަދި އެ ގޮތަށް އަންނަ ފަރާތްތަކުން މީހުން ދިރިއުޅޭ ގެއެއްގައި ކަރަންޓީނެއް ނުކުރެވޭނެ ކަމަށް ވިދާޅުވިއެވެ.

ކޮވިޑް-19 ގެ ކޭސްތައް މަދުވެ މާދަމާއިން ފެށިގެން ބޮޑެތި ލުއިތަކެއް ދޭން ސަރުކާރުންވަނީ ނިންމާފަ އެވެ. އެ ގޮތުން ވެކްސިން ފުރިހަމަކޮށްފައިވާ ފަރާތްތަކުން ކަރަންޓިނު ނުވެ ދަތުރުކުރުމުގެ ހުއްދަ ދިނުމާއި މާލެ ސަރަހައްދުގެ ކާފިއު އުވާލުން ހިމެނެ އެވެ.

ސަރުކާރުން މިއަދު ހާމަކުރި ގޮތުގައި ރާއްޖޭގެ އާބާދީގެ 35 އިންސައްތަ މީހުން ކޮވިޑް ވެކްސިން ފުރިހަމަ ކޮށްފައިވާ ކަމަށެވެ.