ސެކަންޑްރީ ގްރޭޑްތަކުގެ ދަރިވަރުންނަށް ޑިޖިޓަލް ފޮތް ދެނީ

އަންނަ އޮކްޓޫބަރު މަހު ފެށޭ ދިރާސީ އާ އަހަރުގައި ސެކަންޑްރީ ގްރޭޑްތަކުގެ ދަރިވަރުން ކިޔަވާނީ ޑިޖިޓަލް ފޮތް/އީ-ބުކް އިން ކަމަށް އެޑިއުކޭޝަން މިނިސްޓްރީން މިއަދު ބުނެފި އެވެ.

އިނގިރޭސި މީޑިއަމްގެ ފޮތްތައް ޑިޖިޓަލް ފޮތަށް މިހާރު ބަދަލުކޮށްފައިވާ ކަމަށް އަދި ދިވެހި ފޮތްތަކާމެދު ވަކި ގޮތެއް ނުނިމޭކަމަށް ވިދާޅުވެ "އަދަދު" ނޫހަށް ދެއްވި އިންޓަވިއުއެއްގައި އެޑިޔުކޭޝަން މިނިސްޓްރީގެ ސްޓޭޓް މިނިސްޓަރު ޑރ. އަބްދުﷲ ރަޝީދު ވިދާޅުވީ ސަރުކާރުގެ ހުރިހާ ސްކޫލުތަކެއްގައި ގްރޭޑް 9 އިން 12 އަށް ކިޔަވައިދޭން ނިންމާފައި ވަނީ ޑިޖިޓަލް ފޮތުން ކަމަށެވެ. އަދި މިކަމުގެ މަޝްވަރާތައް ކުރިއަށްދާ ކަމަށާއި މިހާރު މި ގެންނަން ނިންމާފައިވާ ބަދަލުތަކަކީ ދާއިމީ ބަދަލުތަކެއް ކަމަށް ވެސް އޭނާ ވިދާޅުވި އެވެ.

"

"މަތީ ގްރޭޑްތަކުގެ ފޮތްތައް ވަރަށް ގިނަ. އުފުލަން ވަރަށް ބަރު. މި ބަދަލާއެކު މަތީ ގްރޭޑްތަކުގެ ފޮތްތައް ގިނަވެފައި އުފުލަން ބަރުވުމަށް ލުޔެއް ލިބިގެންދާނެ"

އެޑިޔުކޭޝަން މިނިސްޓްރީގެ ސްޓޭޓް މިނިސްޓަރު ޑރ. އަބްދުﷲ ރަޝީދު

ޑރ. އަބްދުﷲ ރަޝީދު ފާހަގަކުރެއްވި ގޮތުގައި ފޮތްތައް ޑިޖިޓަލްކުރެވި ކުރިން ބޭނުންކުރި ފޮތްތައް ބޭނުންކުރުން ހުއްޓާލުން ވެގެންދާނީ ތިމާވެއްޓާ ރައްޓެހި މާހައުލެއް ގާއިމުކުރަން ކުރެވޭ ކަމެއް ކަމަށާއި ފޮތްތައް ޑިޖިޓަލް ކުރެވުނު ކަމުގައިވީ ނަމަވެސް ފިޒިކަލީ ހަދާ ފިލާވަޅުތައް ދަރިވަރުން ހަދާނީ ނޯޓް ފޮތުގައި ކަމަށް އޭނާ ވިދާޅުވި އެވެ. މިފޮތްތައް ދަރިވަރުންނާ ހިއްސާކުރެވިގެންދާނީ ދިރާސީ އާ އަހަރު ފެށުމުން ކަމަށް ވެސް އޭނާ ވިދާޅުވި އެވެ.