ކުރީގެ ނޫޓް ބަދަލުކުރުމުގެ ސުންގަޑިއަކީ މި މަހުގެ ނިޔަލަށް

ކުރިން ބޭނުންކުރަމުންއައި ކަރުދާސް ނޫޓުތަކަށް ބަދަލުދޭނީ މިމަހުގެ ނިޔަލަށް ކަމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ)ން ބުނެފި އެވެ.

އެމްއެމްއޭއިން ބުނީ ސަރުކާރު ބަންދުނޫން ދުވަސްތަކުގެ ރަސްމީ ގަޑީގައި ކުރީގެ ނޫޓު ބަދަލުކުރުމަށް އެބޭންކަށް ދިޔުމުން ވަގުތުން ބަދަލުކޮށްދޭނެކަމަށެވެ.

އަދި ރަންދިހަ ފަހެއް ސީރީޒް ނިކުތްއިރު ބާޒާރުގައި ދައުރުވަމުންދިޔަ 2.9 ބިލިއަން ރުފިޔާގެ ތެރެއިން މިހާތަނަށް %95 ނޫޓުތައް އެމްއެމްއޭއަށް ލިބިފައިވާކަމަށެވެ. އަދި ބަދަލުނުކޮށްހުރީ ކުރީގެ ގާތްގަނޑަކަށް %5 ނޫޓުތައްކަމަށެވެ.

މިހާރު ބަދަލު ދެމުން އަންނަނީ ރައީސުލްޖުމްހޫރިއްޔާގެ ޤަރާރަކުން 2016ވަނަ އަހަރުގެ އޯގަސްޓް މަހުގެ 1އިން ފެށިގެން ލީގަލްޓެންޑަރ ނޫން ކަމުގައި ކަނޑައަޅުއްވާފައިވާ 2 ރުފިޔާއާއި 10 ރުފިޔާއާއި 20 ރުފިޔާއާއި 20 ރުފިޔާއާއި 50 ރުފިޔާއާއި 100 ރުފިޔާއާއި 500 ރުފިޔާގެ ނޫޓުތަކަށާއި ރައީސުލް ޖުމްހޫރިއްޔާގެ ޤަރާރަކުން 1 ޖަނަވަރީ 2018 އިން ފެށިގެން ލީގަލްޓެންޑަރ ނޫން ކަމުގައި ކަނޑައަޅުއްވާފައިވާ 5 ރުފިޔާގެ ކަރުދާސް ނޫޓު ތަކަށްކަމަށް އެމްއެމްއޭއިން ބުނެ އެވެ.