އެޗްޕީއޭގެ އުސޫލަށް ވުރެ ހަރުކަށި އުސޫލުތަކެއް ކައުންސިލްތަކުން ގެންގުޅޭކަމުގެ ޝަކުވާ ލިބޭ: އެލްޖީއޭ

ހެލްތް ޕްރޮޓެކްޝަން އެޖެންސީ (އެޗްޕީއޭ)ގެ އުސޫލަށް ވުރެ ހަރުކަށި އުސޫލުތަކެއް ބައެއް ކައުންސިލްތަކުން ގެންގުޅޭކަމުގެ ޝަކުވާ ލިބެމުންދާކަމަށް ލޯކަލް ގަވަރމެންޓް އޮތޯރިޓީ (އެލްޖީއޭ)އިން ބުނެފި އެވެ.

އޮންލައިން ނޫސް ރާއްޖެ އެމްވީއަށް އެލްޖީއޭގެ ޗީފް އެގްޒެކެޓިވް އޮފިސަރ ފާޠިމަތު އަފްޝަން ލަތީފު ވިދާޅުވީ އެޗްޕީއޭގެ އުސޫލާ ފުށުއަރާ ގޮތަށް ބައެއް ކައުންސިލްތަކުން އަމަލުކުރަމުންދާ ކަމުގެ ޝަކުވާ ލިބެމުންދާ ކަމަށާއި، ސޯޝަލް މީޑިއާއިން ވެސް މިފަދަ މައްސަލަތައް ފާހަގަކުރެވިފައިވާ ކަމަށެވެ.

އެފަދަ ޝަކުވާތައް ލިބެމުންދާ ރަށްރަށުގެ ކައުންސިލްތަކަށް އެލްޖީއޭއިން ވަކިވަކިން ގުޅައި، އެގޮތަށް އަމަލުނުކުރުމަށް ނަސޭހަތް ދެމުންދާކަންވެސް އަފްޝަން ފާހަގަކުރެއްވިއެވެ.

ރަށްރަށުގެ ކައުންސިލްތަކުން އެޗްޕީއޭގެ އުސޫލުތަކާއި އެންގުންތަކާ އެއްގޮތަށް އަމަލުކުރުމަށް އެ އޮތޯރިޓީން އިލްތިމާސްކުރެ އެވެ.

ކޮވިޑް-19ގެ އުސޫލުތަކަށް އެޗްޕީއޭއިން ދިފާއިވާ ލުއިތަކާއި ގުޅިގެން މާލެ ސަރަހައްދުން ގިނަ ބަޔަކު ދަނީ އަތޮޅުތަކަށް ދަތުރުކުރަމުންނެވެ. ނަމަވެސް ބައެއް ރަށްރަށުގެ މީހުން އެކަމާ ނުރުހުން ފާޅުކުރެއެވެ. ރަށްރަށުގައި އެޗްޕީއޭގެ އުސޫލުގެ އިތުރުން އެއަށްވުރެ ހަރުކަށި އުސޫލުތައް ނެރެގެން އެކަން ތަންފީޒު ކުރަމުންދެއެވެ. އެރަށެއްގެ ރައްޔިތުން ނޫން ބަޔަކު އެރަށަކަށް ނޭރުވުން ފަދަ މައްސަލަތައް ފެންމަތިވެ އެވެ.

އަފްޝަން ވިދާޅުވީ ކަރަންޓީންވުމަކާނުލައި ދަތުރުކުރުމުގެ ހުއްދަ ދީފައިވަނީ ހަނި ފުރުސަތެއްގެ ތެރެއިން ކަމަށާއި އެއްވެސް މީހެއްގެ ހައްގަށް އުނިކަން ލިބޭގޮތަށް އަމަލުކުރުމަކީ ބަލައިގަނެވޭނެ ކަމެއް ނޫން ކަމަށެވެ.

އަދި ދަތުރުކުރާ ފަރާތްތަކުން ވެސް ބަލި ރައްކާތެރިވުމަށް ކުރަން ޖެހޭ އެންމެހައި ކަންކަން ކުރުމަށާއި، އެޗްޕީއޭގެ އުސޫލުތަކާއި އެއްގޮތަށް އަމަލުތައް ބެހެއްޓުމަށްވަނީ އެދިފަ އެވެ.

ކޮވިޑް-19 އަށްދިން ލުއިތަކާއި އެކު ވެކްސިންގެ 2 ޑޯޒް ޖެހުމަށްފަހު 14 ދުވަސް ފުރިހަމަވެފައިވާނަމަ ނެގެޓިވް ޕީސީއާރް ޓެސްޓާއެކު ރަށަށް ދެވެ އެވެ.