ސާވިސް ޗާޖުގައި މައްސަލައެއް އުޅޭކަން ފާހަގަވާނަމަ ކާކުކަން ނޭނގޭ ގޮތަށް އެންގޭނެ: މިނިސްޓަރު

ރިސޯޓްތަކުގައި މަސައްކަތްކުރާ މުވައްޒަފުންގެ ސާވިސް ޗާޖުގައި މައްސަލައެއް އުޅޭކަން ފާހަގަވާނަމަ އެކަންތައް ޓޫރިޒަމް މިނިސްޓްރީއަށް ކާކުކަން ނޭގޭ ގޮތަށް އެންގޭނެ ކަމަށް ޓޫރިޒަމް މިނިސްޓަރު ޑރ. އަބްދުﷲ މައުސޫމް ވިދާޅުވެއްޖެއެވެ.

އިއްޔެ ޓޫރިޒަމް މިނިސްޓްރީން ކުރިއަށްގެންދިޔަ ނޫސްވެރިންގެ ބައްދަލުވުމުގައި ވާހަކަދައްކަވަމުން މިނިސްޓަރު މައުސޫމް ވަނީ ސާވިސް ޗާޖުގެ ވާހަކައަކީ ދޭތެރެ ދޭތެރެއިން ވަރަށް ބޮޑަށް ދެކެވޭ ވާހަކައެއް ކަމަށާއި މިނިސްޓްރީން ދަނީ ސިނާއަތުގެ މުވައްޒަފުންނާ ވަރަށް ގާތުން މަސައްކަތްކުރަމުން ކަމަށް ވިދާޅުވެފައެވެ. މިނިސްޓްރީން މަސައްކަތްކުރަމުން މިދަނީ ސިނާއަތުގެ ހިއްސާދާރުންނާއެކު ކަމަށާއި މުވައްޒަފުންނަކީ އެ ހިއްސާދާރުންގެ ތެރޭގައި ހިމެނޭ ބައެއްކަން މިނިސްޓަރު ފާހަގަކުރެއްވިއެވެ.

ރާއްޖޭގެ ވަޒީފާއާ ބެހޭ ގާނޫނުގައިވާ ގޮތުން ސާވިސް ޗާޖަކީ ވަޒީފާދޭ ފަރާތުގެ ހައްގެއް ނޫނެވެ. އެއީ އެތަނެއްގައި މަސައްކަތްކުރާ މުވައްޒަފެއްގެ ހައްގެކެވެ. އެއީ ރިސޯޓަކަށް ވިޔަސް ނޫނީ ރެސްޓޯރަންޓަކަށް ވިޔަސް، ސާވިސް ޗާޖެއް ނަގާނަމަ އެއީ އެ ނަގާ ތަނެއްގައި މަސައްކަތްކުރާ މުވައްޒަފުންގެ ހައްގެކެވެ.

ސާވިސް ޗާޖަކީ ރިސޯޓްގެ އާމްދަނީއާ ގުޅިފައި އޮންނަ އެއްޗެއް ކަމުން ސާވިސް ޗާޖުގެ ގޮތުގައި މުވައްޒަފުންނަށް ލިބޭ ވަރު ބޮޑުކުރުމަށް މިނިސްޓްރީން މަސައްކަތްކުރާ ކަމަށް މިނިސްޓަރު ވިދާޅުވިއެވެ.

މިނިސްޓަރު ވަނީ ފައިނޭންޝަލް ޓްރާންސެކްޝަންތައް މިހާރު މިގެންދަނީ އޮންލައިންކޮށް ކަމަށާއި ބޭންކް ޓްރާންސެކްޝަން ތަކަކީ ފަސޭހައިން މިހާރު ބެލެން ހުންނަ މައުލޫމާތުކަން ފާހަގަކުރައްވައި ރިސޯޓްތަކުގައި މިހާރު މަސައްކަތްކުރާ މުވައްޒަފުންނަށް އެ ރިސޯޓަކަށް އަންނަ ފަތުރުވެރިންގެ އަދަދަށް ބަލައި ރިސޯޓަށް އެމަހު ވަންނާނެ އާމްދަނީ އަންދާޒާ ކުރެވޭ ކަމަށާއި ސާވިސް ޗާޖު ރަނގަޅަށް ނުލިބޭކަމަށް ވާނަމަ އެކަން މިނިސްޓްރީއަށް އަންގަން ވާނެ ކަމަށް ވިދާޅުވެފައެވެ.

އެގޮތުން އެކަމަށް ހާއްސަ އީމެއިލެއް މިނިސްޓްރީން ހަދާފައިވާއިރު، ކާކުކަން ނޭނގޭ ގޮތަށް އެ މައުލޫމާތު މިނިސްޓްރީއާ ހިއްސާކުރުމުގެ ފުރުސަތު އެބައޮތް ކަމަށް މިނިސްޓަރު ވިދާޅުވިއެވެ.