ރަޝިޔާ ރީޖަންއިން ރާއްޖެއަށް ފްލައިޓް ދަތުރުތައް ފަށަން ސޮއިކޮށްފި

ރަޝިއާ ހިމެނޭ ރީޖަނުން ފްލައިޓް ތަކެއް ރާއްޖެއަށް ފަށަން ދިވެހި ކުންފުންޏެއް ކަމަށްވާ ރިސޯޓް ލައިފް އިން ސޮއި ކޮށްފި އެވެ.

އެއްބަސް ވުމުގައި ސޮއިކުރުމަށް ރަޝިއާގެ ވެރިރަށް މޮސްކޯގައި ބޭއްވި ރަސްމިއްޔާތުގައި ޓޫރިޒަމް މިނިސްޓަރު ޑރ. އަބްދުﷲ މައުސޫމް އާއި އެމްއެމްޕީއާރްސީގެ މެނޭޖިން ޑިރެކްޓަރު ތޮއްޔިބު މުހައްމަދު ވެސް ބައިވެވި އެވެ.

މި އެއްބަސްވުމުގައި ރިސޯޓް ލައިފްގެ ފަރާތުން ސޮއި ކުރެއްވީ އެ ކުންފުނީގެ މެނޭޖިން ޑިރެކްޓަރު މުހައްމަދު ޝާޒް ވަލީދެވެ.

ރިސޯޓް ލައިފުން އިތުރު އެއާލައިންތަކެއް ގެންނަން ސޮއިކުރިއިރު، ރާއްޖެ އަށް އެންމެ ގިނައިން ޓޫރިސްޓުންގެ ގެންނަ މި ކުންފުނިން ވަނީ ރަޝިއާގައި ވިޔަފާރި ފަށައި "ރިސޯޓް ހޮލިޑޭ" ގެ ނަމުގައި ކުންފުންޏެއް ވެސް ރަޖިސްޓްރީ ކޮށްފަ އެވެ. އަދި އެ ގައުމުގައި އޮފީހެއް ހުޅުވައި ރަޝިއަން ރީޖަން ހިމެނޭ ގޮތަށް ޔޫރަޕުގައި ރާއްޖެ ވިއްކުމުގެ މަސައްކަތް ފަށާފަ އެވެ.

ރާއްޖޭގެ ބޯޑަރު ޖުލައި މަހު ހުޅުވުމާއެކު ރިސޯޓް ލައިފްގެ ބެލުމުގެ ދަށުން ހަތަރު ޗާޓަރު ފްލައިޓެއް ބޭއްވި އެވެ. އަދި މިހާރު ވެސް ދެ ފްލައިޓެއް ބާއްވަމުން ދެ އެވެ.

ރަޝިއާއަކީ މިހާރު ރާއްޖެއަށް އެންމެ ގިނައިން ޓޫރިސްޓުން އަންނަ އެއް ގައުމެވެ. މި އަހަރުގެ މިހާތަނަށް ރާއްޖެ އައި ޓޫރިސްޓުންގެ އަދަދަށް ބަލާއިރު، ރަޝިއާ މާކެޓިން 190 ޕަސެންޓުގެ އިތުރު ވުމެއް އައިސްފައިވެ އެވެ.