ދަރިވަރުންނަށް ނަފްސާނީ އެހީތެރިކަން ފޯރުކޮށްދޭން ހާއްސަ ހޮޓްލައިނެއް ގާއިމުކުރަނީ

ދަރިވަރުންނަށް ނަފުސާނީ އެހީތެރިކަން ފޯރުކޮށްދިނުމަށްޓަކައި އެކަމަށް ހާއްސަ ހޮޓްލައިނެއް ގާއިމުކުރުމުގެ މަސައްކަތްކުރަމުން އަންނަ ކަމަށް އެޑިއުކޭޝަން މިނިސްޓްރީން ވިދާޅުވެއްޖެ އެވެ.

މަތީ ސާނަވީން ފެށިގެން ނާސަރީ އާ ހަމައަށް ކިޔަވަމުން އަންނަ ހުރިހާ ދަރިވަރުންނަށް ވެސް ވަނީ ކޮވިޑު-19 ގެ ސަބަބުން ނަފުސާނީ ގޮތުން އަސަރު ކޮށްފައި ކަމަށް އެޑިއުކޭޝަން މިނިސްޓްރީ އާއި ޔުނިސެފް ގުޅިގެން ފާއިތުވެ ދިޔަ އަހަރު ތައްޔާރުކުރި އެޑިއުކޭޝަން ރެސްޕޮންސް ޕްލޭން (އީއާރުޕީ) ރިޕޯޓުން ދައްކަ އެވެ.

91،000 ދަރިވަރުންނަށް ނަފްސާނީ ގޮތުން އަސަރުކޮށްފައިވާ ކަމަށް އެރިޕޯޓުން ދައްކަ އެވެ. ވީޓީވީގައި ވާހަކަދައްކަމުން އެޑިއުކޭޝަން މިނިސްޓްރީގެ ޑެޕިއުޓީ މިނިސްޓަރު އަހްމަދު މުޖާހިދު ވިދާޅުވީ ދަރިވަރުންނަށް ނަފުސާނީ މައްސަލަތައް ދިމާވުމަކީ މިނިސްޓްރީން ނުހަނު ކަންބޮޑުވާ ކަމެއް ކަމަށާއި މިފަދަ ހޮޓްލައިނެއް ގާއިމު ކުރަނީ ރާއްޖޭގެ ހުރިހާ ހިސާބެއްގައި ވެސް ކިޔަވާ ކުދިންނަށް ވީހާވެސް ގާތުން އެހީތެރިކަން ފޯރުކޮށްދިނުމުގެ ގޮތުން ކަމަށެވެ.

"

"މިނިސްޓްރީން މިކުރާ މަސައްކަތުގެ ތެރެއިން ފާހަގަ ކޮށްލަން ބޭނުންވޭ އަޅުގަނޑުމެން ދަރުވަރުންނަށް ނަފުސާނީ އެހީތެރިކަން ފޯރުކޮށްދިނުމަށްޓަކައި ހާއްސަ ހޮޓްލައިނެއް ގާއިމު ކުރުމުގެ މަސައްކަތް މި ދަނީ ކުރަމުން. މިމަސް ނިމޭއިރު އެކަން ފެށިގެންދާނެ"

އެޑިއުކޭޝަން މިނިސްޓްރީގެ ޑެޕިއުޓީ މިނިސްޓަރު، އަހްމަދު މުޖާހިދު

ދެ ޑޯޒު ފުރިހަމަ ކުރި ނަމަވެސް ފަސް ދުވަހާއި ހަތް ދުވަހު ގޭގައި މަޑު ކުރުމަށްފަހު ނެގެޓިވް ޕީސީއާރު ހިފައިގެން ނޫނީ ސުކޫލަށް ނުކުތުން މަނާވާނެ ކަމަށާއި ވެކްސިންގެ ދެ ޑޯޒު ފުރިހަމަ ނުކުރާ މުވައްޒަފުން ސާދަ ދުވަހުގެ ކަރަންޓީނަކަށް ފަހު ކަމަށް ސުކޫލަށް ނުކުންނާނީ ވެސް މުޖާހިދު ވިދާޅުވި އެވެ. އަދި އޭނާ ވިދާޅުވީ އެކަން ކަން އެޑިއުކޭޝަނުން ކަށަވަރު ކުރާނެ ކަމަށެވެ.

ސުކޫލުން ބޭރުގައިވެސް ކުދިން ގެންގުޅޭއިރު އެޗްޕީއޭގެ ގައިޑްލައިންތަކާ ހިލާފުނުވާ ގޮތަކަށް ކުދިންގެ ކަންކަން ބެލެހެއްޓުމަށް ބެލެނިވެރިން ހާއްސަ ސަމާލުކަމެއް ދިނުމަށް މިނިސްޓްރީން ވަނީ އެދިފަ އެވެ.