އުތުރުގެ އޮޑިޓް އޮފީސް ކުޅުދުއްފުށީގައި ހުޅުވަނީ، މުވައްޒަފުން ހޯދަން އިއުލާނުކޮށްފި

އުތުރު ސަރަހައްދުގައި ގާއިމުކުރާ އޮޑިޓްގެ ސަރަހައްދީ އޮފީސް ކުޅުދުއްފުށީގައި ގާއިމުކުރަން ނިންމާ އެ އޮފީހަށް ބޭނުންވާނެ މުވައްޒަފުން ހޯދުމަށް އިއުލާނުކޮށްފި އެވެ.

ބޮޑުތިލަދުންމަތީގެ ރަށްތަކަށް ހާއްސަކޮށް މި ސަރަހައްދުގައި އޮޑިޓަރ ޖެނެރަލުގެ، އޮފީހެއް ގާއިމުކުރައްވާނެކަމަށް މިދިޔަ އަހަރު އޭރުގެ އޮޑިޓަރ ޖެނެރަލް ހަސަން ޒިއްޔަތު ވަނީ ވިދާޅުވެފަ އެވެ. އެހެންނަމަވެސް އެ އޮފީސް މިދިޔަ އަހަރު ހުޅުވިފައެއް ނުވެ އެވެ.

ކޭއޯއަށް މައުލޫމާތު ދެމުން އޮޑިޓް އޮފީހުގެ މުވައްޒަފަކު ވިދާޅުވީ، މިއަހަރުގެ ތެރޭގައި އޮފީސް ހުޅުވުމުގެ މަސައްކަތްކުރަމުންދާ ކަމަށާއި ސެޕްޓެމްބަރުމަހު ހުޅުވޭތޯ މަސައްކަތްކުރަމުންދާ ކަމަށެވެ.

އޮޑިޓް އޮފީހުން ކުރި އިއުލާނެއްގައި ބުނެފައިވަނީ ކުޅުދުއްފުށީގައި ގާއިމުކުރާ އުތުރުގެ ސަރަހައްދީ އޮފީހަށް ބޭނުންވާ ދެ މުވައްޒަފުން ހޯދުމަށް މިހާރު އިއުލާނުކޮށްފައިވާކަމަށެވެ. އެގޮތުން އެސިސްޓަންޓް އޮޑިޓަރ (ގްރޭޑް 1) ގެ ދެ މުވައްޒަފުން ނެގުމަށެވެ.

އެގޮތުން މުވައްޒަފުން ނެގުމަށް އިންޓަވިއު ކުރުން އޮންނާނީވެސް ކުޅުދުއްފުށީގައި ކަމަށް އޮޑިޓަރ ޖެނެރަލްގެ އޮފީހުން މައުލޫމާތު ދެއެވެ.

އުތުރު ސަރަޙައްދީ އޮފީސް ގާއިމުވުމުން އުތުރުގެ އަތޮޅުތައް ކަމުގައިވާ ހއ.، ހދ. އަދި ށ. އަތޮޅުގެ ސަރުކާރު އިދާރާތަކުގެ އޮޑިޓްތައް ކުރިއަށް ގެންދާނީ އެ އޮފީހުންނެވެ. އެގޮތުން އުތުރު ސަރަޙައްދީ އޮފީސް ގާއިމުވުމުން އެ ސަރަޙައްދުގެ އިދާރާތަކަށް ގާތުން ފުރިހަމަ ހިދުމަތެއް ދެވޭނެ ކަމަށާއި ސަރުކާރުގެ މުވައްޒަފުންނަށް މާލީ ތަމްރީންތައް ދިނުމަށް ފަސޭހަވެގެންދާނެ ކަމަށް އެ އޮފީހުން ބުނެއެވެ.

2015 ވަނަ އަހަރު އޮޑިޓަރ ޖެނެރަލްގެ އޮފީހުން ވަނީ ދެކުނު ސަރަޙައްދީ އޮފީހެއް އައްޑޫ ސިޓީ ހިތަދޫގައި ގާއިމް ކޮށް ގއ.، ގދ.، ޏ. އަދި އައްޑޫ އަތޮޅުގެ ދާއިރާތަކުގެ އޮޑިޓް މަސައްކަތްތައް އެ އޮފީހަށް ބަދަލު ކޮށްފައެވެ.