ނޮޅިވަރަމުން ކޮވިޑް ޖެހުނު މީހުންގެ ތެރޭގައި ފަސް ކުޑަކުދިން

މިދިޔަ ހުކުރު ދުވަހު ފުލޫ އޯޕީޑީން ނެގި ސާމްޕަލްތަކެއް ޕޮޒިޓިވްވެ ނޮޅިވަރަމް މޮނީޓަރިންގެ ހާލަތަށް ގެނެސްފައިވާއިރު ޕޮޒިޓިވްވި މީހުންގެ ތެރޭގައި 5 ކުޑަކުދިން ހިމެނޭކަމަށް އެރަށު ކައުންސިލުން ބުނެފިއެވެ.

ކައުންސިލްގެ ރައީސް ޔޫސުފް މުހައްމަދު ބުނީ މިހާތަނަށް ޕޮޒިޓިވްވެފައިވަނީ 7 މީހުން ކަމަށާއި އެއީ ބޮޑު 2 މީހުންނާއި ކުޑަ 5 ކުދިންނަކަމަށެވެ. އެ ހުރިހާ ކުދިންނަކީވެސް 5 އަހަރުން ދަށުގެ ކުދިންކަމަށް ޔޫސުފް ވިދާޅުވި އެވެ.

މި ކޭސްތަކާ ގުޅިގެން 6 ގެއެއް މޮނީޓަރިންގެ ހާލަތަށް ގެނެސްފައިވާއިރު ކޮންޓެކްޓް ޓްރޭސިންގެ މަސައްކަތް ކުރިއަށްދާކަމަށާއި މިއަދުގެ ވަގުތެއްގައި އިތުރު ސާމްޕަލް ޓެސްޓުކުރުމަށް ކުޅުދުއްފުއްޓަށް ފޮނުވާލެވޭނެކަމަށްވެސް ޔޫސުފް ވިދާޅުވި އެވެ.

އޭނާ ވިދާޅުވީ ޕޮޒިޓިވް ކޭސްތަކެއް މި ފެނުނީ ރޯގާގެ އަލާމާތްތައް އުޅޭތީ މި ހަފްތާއިން ފެށިގެން ރަށުގެ ޕްރީ ސްކޫލް ބަންދު ކުރަން ކައުންސިލުން ނިންމާފައިވަނިކޮށްކަމަށެވެ.

އާންމުގޮތެއްގައި ރަށުގެ ހާލަތު ރަނގަޅުކަމަށާއި ނަމަވެސް އެއްވެސް އަލާމާތެއް ފެންނަނަމަ ސިއްހީ މަރުކަޒަށް ދެއްކުމަށް ނުވަތަ ގުޅައި މައުލޫމާތު ހިއްސާކުރުމަށް ކައުންސިލުން ވަނީ އެދިފައެވެ.