އަންނަ އަހަރުގެ އެޑެކްސެލް އޭއެސް އިމްތިހާނު ފަސްކޮށްފި

އޭ ލެވެލްގައި ހަދާ އެންމެ ފުރަތަމަ އިމްތިހާނު، އެޑެކްސެލްގެ އޭ އެސް އިމްތިހާނު އެޑިއުކޭޝަން މިނިސްޓްރީން ފަސްކޮށްފި އެވެ.

އެޑިއުކޭޝަން މިނިސްޓްރީން އެންމެ ފުރަތަމަ ހަމަޖައްސާފައި އޮތީ އަންނަ އަހަރުގެ މެއި/ޖޫންގައި އޭއެސް އިމްތިހާނު ބާއްވާށެވެ. ނަމަވެސް، އަންނަ މަހުގެ 26 ގައި ގްރޭޑު 11 ފަށައި، މެއި މަހު އިމްތިހާނު ހެދުމަށް ދަރިވަރުންނަށް ފުރިހަމައަށް ތައްޔާރުނުވެވޭނެ ކަމުގެ ކަންބޮޑުވުންތައް ހިއްސާކުރުމުން މިނިސްޓްރީން ވަނީ އެ ނިންމުން ބަދަލުކޮށްފަ އެވެ.

މިނިސްޓްރީން ސްކޫލުތަކަށް ފޮނުވި ސާކިއުލާގައި ބުނީ، މިދިޔަ އާދިއްތަ ދުވަހު ޕްރިންސިޕަލުންނާ އެކު ބޭއްވި ބައްދަލުވުމުގައި ހުށަހަޅާފައިވާ ގޮތަށް އޭ އެސް އިމްތިހާނު އަންނަ އަހަރުގެ އޮކްޓޯބަރު/ނޮވެމްބަރަށް ފަސްކޮށްފައިވާ ކަމަށެވެ.

ކޮވިޑާއި ގުޅިގެން ދަރިވަރުންގެ ކިޔެވުމަށްވެސް ބޮޑެތި ބަދަލުތަކެއް އައިސް މިދިޔަ އަހަރުގެ އޯލެވެލް އަދި އޭލެވެލް އިމްތިހާން ބާއްވަން ފުރަތަމަ ތާވަލްކުރި ދުވަހަށް ނުބޭއްވި ދިގުލައިގެން ދިޔައެވެ. މިގޮތުން މިދިޔަ އަހަރުގެ އޯލެވެލް އިމްތިހާން ބާއްވާފައިވަނީ މިއަހަރުއެވެ. އަދި އޭލެވެލް އިމްތިހާންގެ ޕޭޕަރުތައް ލީކުވުމާ ގުޅިގެން އެ އިމްތާހާން ކެންސަލްކުރިއެވެ.