އަންނަމަހުގެ ނިޔަލަށް ސިއްހީ ކުއްލި ނުރައްކަލުގެ ހާލަތު އިތުރުކޮށްފި

ކޮވިޑް-19 އާ ގުޅިގެން ރާއްޖޭގައި އިއުލާންކޮށްފައިވާ ސިއްހީ ކުއްލި ނުރައްކަލުގެ ހާލަތު އަންނަ މަހުގެ އެއްވަނަ ދުވަހުގެ ނިޔަލަށް އިތުރުކުރުމަށް ހެލްތް މިނިސްޓްރީން ނިންމައިފި އެވެ.

ހެލްތު މިނިސްޓަރު އަހުމަދު ނަސީމް ސޮއި ކުރައްވައި މިއަދު ނެރުއްވި ގަރާރުގައިވާ ގޮތުން އަންނަ މަހުގެ އެއް ވަނަ ދުވަހާ ހަމައަށް ސިއްހީ ކުއްލި ނުރައްކަލުގެ ހާލަތު ދެމެހެއްޓުމަށް ވަނީ ނިންމައިފަ އެވެ.

ރާއްޖެއިން ކޮވިޑް ފެނިގެން ސިއްހީ ކުއްލި ނުރައްކަލުގެ ހާލަތު އެންމެ ފުރަތަމަ އިއުލާން ކުރީ މާޗު 12، 2020 ގަ އެވެ. އޭގެފަހުން މިހާލަތު އަންނަނީ އިތުރު މުއްދަތަށް ދިގުކުރަމުންނެވެ.

ކޮވިޑަށް ޕޮޒިޓިވްވާ ރޭޓް ޖުލައި މަހު އެއް ޕަސެންޓުގައި ހުރި ނަމަވެސް އެ އަދަދު މިދިޔަ މަސް ނިމުނުއިރު ތިން ޕަސެންޓަށް އިތުރުވެފައިވެ އެވެ. ނަމަވެސް ރާއްޖޭގެ ވެކްސިން ޖެހޭ އާބާދީގެ 90 އިންސަތައަށް ވެކްސިން ޖެހުމަށް މިދިޔަ މަހު ކުރިއަށް ގެންދިޔަ ކެމްޕޭނުގައި ގިނަބަޔަކު ވެކްސިން ފުރިހަމަކޮށްފައިވާއިރު ދެ ޑޯޒް ފުރިހަމަކުރި ފަރާތްތަކަށްދަނީ ލުއިތައް ދެމުންނެވެ.