ކުޅުދުއްފުށީ ލޯކަލް މާރުކޭޓް އިމާރާތް ކޮވިޑް ފެސިލިޓީއަކަށް ބަދަލުކުރަނީ

އެންމެ ފަހުން ކުޅުދުއްފުށި ސިޓީގައި ކޮވިޑް ފެސިލިޓީއެއް ގާއިމުކުރުމަށް ސަރުކާރުން ނިންމައިފި އެވެ. ކޮވިޑަށް ފަރުވާދޭނެ ފެސިލިޓީއެއް ބޮޑު އާބާދީއެއް ދިރިއުޅޭ އަދި އަތޮޅުތެރޭގެ އެންމެ ގިނަ މީހުން ހިދުމަތް ހޯދައި ކުޅުދުއްފުށީގައި ގާއިމުކޮށްފައިނުވުމުން އެކަމާ ގިނަ ބަޔަކު ދިޔައީ ކަންބޮޑުވުންފާޅުކުރަމުންނެވެ.

ކުޅުދުއްފުށީ ރީޖަނަލް ހޮސްޕިޓަލް (ކޭއާރުއެޗުން) މިރޭ ކުރި އިއުލާނެއްގައި ބުނީ އެ ހޮސްޕިޓަލުން ފުލޫ ކުލިނިކެއްގެ ގޮތުގައި ބޭނުންކުރަމުން އަންނަ ލޯކަލް މާރުކޭޓު އިމާރާތުގައި ކޮވިޑް ފެސިލިޓީއެއް ގާއިމްކުރުމަށް ގެންނަށްޖެހޭ ބަދަލުތައް ގެނެސްދޭނެ ފަރާތެއް ހޯދަން އިއުލާނުކޮށްފަ އެވެ.

ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ކުޅުދުއްފުއްޓަށް އެންމެފަހުން ކުރެއްވި ދަތުރުފުޅުގައި ކޭއާރުއެޗުގެ ހިންގުމާ ހަވާލުވެހުންނެވި، ޑެޕިއުޓީ ޑިރެކްޓަރު އަހުމަދު ދާއޫދު ވަނީ ކޮވިޑް ފެސިލިޓީއެއް ނެތުމުން އެކަމުގެ ކަންބޮޑުވުން ރައީސްއަށް ދަންނަވާފަ އެވެ. އަދި މޭޔަރުވެސް އެކަމުގެ ޝަކުވާ ވަނީ ރައީސްއާ ހިއްސާކުރައްވާފަ އެވެ.

ކޭއާރުއެޗުން ކުރި އިއުލާނުގައި ބުނީ މި މަސައްކަތް ކޮށްދިނުމަށް ޝައުޤުވެރިވާ ފަރާތްތަކުން ގެޒެޓްކުރެވިފައިވާ ރެޖިސްޓްރޭޝަން ޝީޓް ފުރުއްވުމަށްފަހު މިމަހު 2 ން 13 ދުވަހުގެ 13:30 ގެ ކުރިން [email protected] އަށް އީމެއިލް ކުރުމަށެވެ.

މި އިއުލާނާ ގުޅޭ މައުލޫމާތު ކަރުދާހުގެ ސޮފްޓް ފައިލް ރަޖިސްޓަރ ކުރާ ފަރާތްތަކަށް އީ މެއިލް މެދުވެރިކޮށް ފޮނުވާނެ ކަމަށް އެ ހޮސްޕިޓަލުން ބުންޏެވެ.

މި މަސައްކަތުގެ މައުލޫމާތު ސާފުކުރުން މިމަހު 14 ވަނަ ދުވަހު 10:30 ގައި އަދި ރަޖިސްޓްރީކޮށްފައިވާ ފަރާތްތަކުން އަންދާސީ ހިސާބު ހުށަހެޅުން މިމަހު 22 ވަނަ ދުވަހު 10:30 ގައި އޮންނާނެ އެވެ.

ކުޅުދުއްފުށީގައި ކޮވިޑް ފެސިލިޓީއެއް ގާއިމުކުރެވިފައި ނެތުމުން އެކަމުގެ ކަންބޮޑުވުން ވަރަށް ގިނަ ބަޔަކު ދަނީ ފާޅުކުރަމުންނެވެ. ބޮޑު އާބާދީއަކަށް ވެފައި އަދި ރީޖަނަލް ހޮސްޕިޓަލްގެ ހުންނަ ރަށަށްވުމުން ކޮވިޑް ފެސިލިޓީއެއްގެ މުހިންމުކަން ބޮޑެވެ. އެކަމުގެ ކަންބޮޑުވުން މެމްބަރު ޔާސިރު އަބުދުލް ލަތީފްވެސް މީގެ ކުރިން ވަނީ ފާޅުކުރައްވާފަ އެވެ.