ކުޅުދުއްފުށީގެ ދެ ވިޔަފާރީއަކުން ނޮޅިވަރަމަށް ރޯމަސް ހަދިޔާކޮށްފި

ކުޅުދުއްފުށީގެ ދެ ވިޔަފާރީއަކުން ހދ ނޮޅިވަރަމަށް 1.2 ޓަނުގެ ރޯމަސް މިއަދު ހަދިޔާކޮށްފި އެވެ. މަސް ހަދިޔާކޮށްފައިވަނީ އެޑްމޭން އަދި ފަރިރީތިންނެވެ.

އެރަށު ކައުންސިލްގެ ނައިބު ރައީސް މުހައްމަދު ހުސެއިން ކޮށްފައިވާ ޕޯސްޓެއްގައި ބުނެފައިވަނީ ކައުންސިލްގެ ފަރާތުން ހުރިހާ ގޭބީސީއަކަށް ހަމަހަމަގޮތެއްގައި މަސްފޯރުކޮށްދިނުމަށް ކައުންސިލުން މަސައްކަތް ކުރާކަމަށާއި ކަރަންޓީނުގައި ހުރިގެތަކަށް ކައުންސިލުން މަސްފޯރުކޮށްދޭނެ ކަމަށެވެ.

އެގޮތުން މުހައްމަދު ވަނީ މަސް ހަދިޔާކޮށްދިން ދެ ވިޔަފާރިއަށާއި މަސް ބެހުމުގައި ހަރަކާތްތެރިވި ވޮލެންޓިއަރުންނަށް ޝުކުރު އަދާކޮށްފައެވެ.

ނޮޅިވަރަމުން ކޮވިޑް ކޭސްތަކެއް ފެނި މޮނީޓަރިންގެ ހާލަތަށް ގެނެސްފައިވަނީ މިދިޔަ އޮގަސްޓުމަހު 28 ވަނަ ދުވަހުއެވެ. މޮނީޓަރިންގެ ހާލަތުގައި އޮންނަތާ ހަފްތާއެއްހާ ދުވަސް ވެފައިވާއިރު އެރަށުގެ އެކްޓިވް ކޭސްތަކުގެ އަދަދު ވަނީ 119 އަރާފަައެވެ.

އެރަށު ކައުންސިލުން ނެރުނު ބަޔާނެގައި ބުނެފައިވަނީ އެރަށުގައި ކޮވިޑް ޖެހިފައިވާ ފަރާތްތަކަށް ފަރުވާ ދޭނެ އެކަށީގެންވާ ވަސީލަތެއްވެސް ނެތްކަމަށާއި ރައްޔިތުން ގޭ ބަންދުގައި ތިބެން ޖެހުމުގެ ސަބަބުން ރައްޔިތުން އާމްދަނީ ހޯދުމަށް ކުރަމުން އަންނަ މަސައްކަތްތައްވެސް ވަނީ ހުއްޓިފައި ކަމަށެވެ.