އަލީ ވަހީދު ހައްޔަރުކުރިކަން ފުލުހުންނަށް އަންގައިފި

އަލީ ވަހީދު ހައްޔަރުކުރިކަން ރަސްމީކޮށް ދިވެހި ފުލުހުންނަށް އަންގާފައިވާކަމަށް ފުލުހުން ބުނެފި އެވެ.

އިނގިރޭސި ވިލާތުގައި ހުންނަވަނިކޮށް ވިސާގެ މައްސަލައިގައި އޭނާ ހައްޔަރު ކުރިތާ 12 ދުވަސް ފަހުން ފުލުހުން ބުނެފައިވަނީ ކުރީގެ ޓުއަރިޒަމް މިނިސްޓަރ އަލީ ވަހީދު އިމިގްރޭޝަން ކުށްތަކެއްގައި އިނގިރޭސިވިލާތުގައި ހައްޔަރުކޮށްފައިވާކަމަށް އެ ގައުމުގެ ފުލުހުން ރަސްމީކޮށް އަންގާފައިވާކަމަށެވެ.

އަލީ ވަހީދު ހައްޔަރުކޮށްފައިވަނީ މިދިޔަ މަހުގެ 25 ވަނަ ދުވަހު އެވެ. އޭނާ ހައްޔަރުކޮށްފައިވަނީ ރާއްޖޭގެ ބައެއް މީޑިއާތަކާއެކު ޕްރެސް ކޮންފަރެންސެއް ބާއްވަން ތައްޔާރުވަމުން ދަނިކޮށެވެ.

ކޯޓުގެ ހުރުމަތް ކެނޑިކަމުގެ ކުށުގައި އޭނާގެ މައްޗަށް އިއްވާފައިވާ 2 މަހާއި 12 ދުވަހުގެ ހުކުމް ތަންފީޒު ކުރުމަށް އޭނާ މާލެ ގެނައުމަށް އިންޓަރ ޕޯލްގެ އެހީތެރިކަމަށް ރާއްޖެއިން އެދިފައިވެއެވެ.