ޒުވާން ރަޑުކާނޫއަށް ތާރީހީ މޮޅެއް، ސެމީއަށް ދަތުރުކޮށްފި

ބްރިޓިޝްގެ ޒުވާން ކުޅުންތެރިޔާ އެމާ ރަޑުކާނޫ ދުނިޔޭގެ 12 ވަނައިގައި އޮތް ބެލިންޑާ ބެންސިޗް ބަލިކޮށް ޔޫއެސް އޯޕަންސްގެ ސެމީ ފައިނަލަށް ދަތުރުކޮށް ތާރީހީ މޮޅެއް ހޯދައިފި އެވެ.

އުމުރުން 18 އަހަރުގެ ރަޑުކާނޫ ވަނީ އޭނާގެ ހުރިހާ ހުނަރަކާ ކުޅަދާނަކަމެއް ދައްކާލާ ބެލިންޑާ ބަލިކޮށްފަ އެވެ. މިމެޗުގެ ސެޓުތައް ރަޑުކާނޫ ގެންދިޔައީ 6 - 3 އަދި 6 - 4 ންނެވެ.

މިމޮޅާއެކު ރަޑުކާނޫ ދުނިޔޭގެ ގަދަ 50 އަށް އަދި ބްރިޓިޝްގެ އެއްވަނަ އަންހެން ކުޅުންތެރިޔާ ވެގެންދާނެ އެވެ.

ޔޫއެސް އޯޕަންސްގައި ބުރާސްފަތި ދުވަހު ސެމީގައި މާރިއާ ސައްކަރީއާ ދެކޮޅަށް އެމާ ރަޑުކާނޫ ނުކުންނަން ޖެހޭނެ އެވެ. މާރިއާ ސައްކަރީ އޮތީ ދުނިޔޭގެ 18 ވަނައިގަ އެވެ. އޭނާ ސެމީއަށް ދަތުރުކުރީ 4 ވަނައިގައި އޮތް ކެރޮލީނާ ޕްލިސްކޯވާ ބަލިކޮށްފަ އެވެ.

ދުނިޔޭގެ 150 ވަނައިގައި އޮތް ރަޑުކާނޫގެ 2 ވަނަ ގްރޭންޑް ސްލޭމްއާއެކު އޭނާ ވެގެންދާނީ ގަދަ 100 އަށް ވުރެ ދަށުގައި އޮވެ ޔުއެސް އޯޕަންސް ސެމީއަށއް ދަތުރުކުރި 3 ވަނަ އަންހެން ޓެނިސް ކުޅުންތެރިޔާ އެވެ.

ޔޫއެސް އޯޕަންސްގެ ގަދަ 4 އަށް ދަތުރުކުރާ ކުޅުންތެރިންނަށް ޕްރައިޒް މަނީގެ ގޮތުގައި 675000 ޑޮލަރު ލިބެ އެވެ.