ޑްރަގް މައްސަލަ، ހެލްތް މިނިސްޓްރީވެސް އޮތީ އަދި ކަންކަން ދަސްކުރުމުގެ މަރުހަލާގައި: މިނިސްޓަރު ނަސީމް

ރާއްޖޭގެ ޑްރަގުގެ މައްސަލައަށް އަވަސް ހައްލެއް ނެތް ކަމަށާއި އަދިވެސް ހެލްތު މިނިސްޓްރީ އޮތީ ކަންކަން ދަސްކުރުމުގެ މަރުހަލާގައި ކަމަށް ހެލްތު މިނިސްޓަރު އަހްމަދު ނަސީމް މިއަދު ވިދާޅުވެއްޖެ އެވެ.

ނަސީމް މިހެން ވިދާޅުވީ ނެޝަނަލް ޑްރަގް އޭޖެންސީ (އެންޑީއޭ)ގެ މަސައްކަތްތަކާ ގުޅޭ ގޮތުން މައުލޫމާތު ދެމުންނެވެ.

މިއަދު ރައްޔިތުންގެ މަޖިލީހަށް ހާޒިރުވެވަޑައިގެން މެންބަރުން ކުރެއްވި ސުވާލުތަކަށް ޖަވާބު ދެއްވަމުން ނަސީމް ވިދާޅުވީ މަސްތުވާތަކެތީގެ މައްސަަލައަށް ހައްލު ހޯދުމުގެ މަރުހަލާ ފަށެން ޖެހޭނީ ގޭތެރެއިން ކަމަށެވެ. މައިންބަފައިންނާއި ގާތްތިމާގެ މީހުންގެ ހިއްސާ އެކަމުގައި ބޮޑުކަން ނަސީމް ފާހަގަކުރެއްވިއިރު އެ މީހުންގެ ހިއްސާއާ ނުލާއި މި މައްސަލައަށް ހައްލެއް ނުލިބޭނެ ކަމަށް ވެސް އޭނާ ވަނީ ވިދާޅުވެފަ އެވެ.

ޑްރަގްގެ މައްސަލަ ރާއްޖޭގައި އެކަށީގެންވާ ގޮތަކަށް ދިރާސާއެއް ވެސް ކޮށްފައި ނެތްކަން ފާހަގަކުރައްވަމުން މިނިސްޓަރު ނަސީމް ވިދާޅުވީ އެ މައްސަލަ ރަނގަޅަށް ދެނެގަތުމަށްޓަކައި ކުރަން ޖެހޭ ދިރާސާގެ މަސައްކަތް މިހާރު ވަނީ ފަށާފައި ކަމަށެވެ.

ނަސީމް ވަނީ ޑްރަގްގެ މައްސަލަ ރަނގަޅަށް ދެނެގަތުމަށް ކުރާ މަސައްކަތުގައި ކަމާ ބެހޭ ހުރިހާ ފަރާތްތަކެއްގެ ލަފާ ހޯއްދަވާނެ ކަމަށްވެސް މިއަދު ވިދާޅުވެފަ އެވެ. ނަސީމް މިހެން ވިދާޅުވެފައިވަނީ ވެލިދޫ ދާއިރާގެ މުހައްމަދު އަބްދުﷲ ޝަފީގްގެ ސުވާލަކަށް ޖަވާބު ދެއްވަމުންނެވެ.

މިނިސްޓަރު އިތުރަށް ވިދާޅުވީ މަސްތުވާތަކެތި ބޭނުންކުރާ މީހުންނަށް ހާއްސަ ޑޮކްޓަރުން ވަރަށް އަވަހަށް ރާއްޖެއަށް ގެންނާނެ ކަމަށާއި މައްސަލައަކީ ގައުމީ މައްސަލައެއްކަން ފާހަގަކުރައްވާފަ އެވެ. އަދި މިކަމުގައި ވަރަށް ބޮޑަށް ރައްޔިތުންގެ މަޖިލީހުގެ އެހީ ބޭނުންވާނެ ކަންވެސް އޭނާ ފާހަގަކުރެއްވި އެވެ.