ޓޫރިޒަމްގެ ރަންޔޫބީލް ކައުންޓްޑައުން މިރޭ ފަށަނީ

ރާއްޖޭގެ ޓޫރިޒަމަށް 50 އަހަރު ފުރޭ ރަންޔޫބީލް ހަރަކާތްތަކަށް ތައްޔާރުވުމަށްޓަކައި ކައުންޓްޑައުން މިރޭ ފެށުމަށް ނިންމައިފި އެވެ.

ޓޫރިޒަމް މިނިސްޓްރީން ބުނީ މިރޭގެ ރަސްމިއްޔާތުގައި ރަންޔޫބީލްގެ ތީމް ލަވަ ރައީސް އިބްރާހީމް މުހައްމަދު ސޯލިހް ނެރެދެއްވާނެ ކަމަށެވެ. މި ރަސްމިއްޔާތު ބާއްވަނީ ރާއްޖޭގައި ހުޅުވި ފުރަތަމަ ރިސޯޓު، ކުރުނބާ މޯލްޑިވްސްގަ އެވެ. ރަސްމިއްޔާތު ޝަރަފްކޮށްދެއްވާ ކައުންޓްއުން ފައްޓަވައި ދެއްވާނީ ވެސް ރައީސް ސޯލިހެވެ.

މިރޭގެ ރަސްމިއްޔާތުގައި ޓޫރިޒަމް ދާއިރާގެ ތަޖުރިބާ ކާރުންނާއި ރިސޯޓްތައް ހިންގަވާ ބޭފުޅުންނާއި ރިސޯޓުތަކުގެ އިސްވެރިން ބައިވެރިވާނެ ކަމަށްވެސް ޓޫރިޒަމް މިނިސްޓްރީން މައުލޫމާތު ދެއްވަ އެވެ.

ރާއްޖޭގެ ޓޫރިޒަމަށް 50 އަހަރު ފުރޭ ރަންޔޫބިލް އަންނަ އަހަރު ފާހަގަކުރާއިރު ރާއްޖޭގައި 150 ރިސޯޓު މިވަގުތު ދަނީ ހިންގަމުންނެވެ. ޓޫރިޒަމަށް 50 އަހަރު ފުރޭ ރަންޔޫބިލްގެ ހަރަކާތްތަކުގައި ބޭނުންކުރުމަށް ހާއްސަކޮށްފައިވާ ލޯގޯ މީގެ ކުރިން ވަނީ ދައްކާލާފަ އެވެ.