ތައުލީމީ މަންހަޖު ތަރައްގީކުރާނެ މީހުން ރާއްޖޭން ނުލިބުމުގެ ބިރު ބޮޑު: ރައީސް

ރާއްޖޭގެ ތައުލީމީ ދާއިރާގައި މިއަދު މަސައްކަތްކުރާ ބިދޭސީ ޓީޗަރުންނާއި ވަގުތީ ޓީޗަރުން އިތުރުވަމުން ދަނީ ކަންބޮޑުވާންޖެހޭ މިންވަރަކަށް ކަމަށާއި، އެކަމަށް އަވަސް ހައްލެއް ހޯދަންޖެހޭ ކަމުގައި ރައީސް އިބްރާހީމް މުހައްމަދު ސޯލިހް ވިދާޅުވެއްޖެ އެވެ.

އެމަނިކުފާނު މި މޭރުމުން ވިދާޅުވީ 2019 ވަނަ އަހަރުގެ މަތީ ސާނަވީ އިމްތިހާނުތަކުގެ މަތީ ވަނަތަކަށް އިނާމާއި ހަނދާނީ ލިޔުން ދިނުމަށް ރޭ ތާޖުއްދީން ސްކޫލްގައި ބޭއްވި ޖަލްސާގައި ވާހަކަފުޅުދައްކަވަމުންނެވެ.

ރައީސް ވިދާޅުވީ ރާއްޖޭގެ ތައުލީމީ ދާއިރާގައި 6498 ދާއިމީ ދިވެހި މުދައްރިސުން އެބަ މަސައްކަތް ކުރާކަމަށާއި ރާއްޖެއިން ބޭރުގެ 1730 މުދައްރިސުންނާއި 891 ވަގުތީ މުދައްރިސުންނާއެކު ޖުމްލަ 9119 މުދައްރިސުން މިހާރު ރާއްޖޭގައި އެބަ މަސައްކަތް ކުރާ ކަމަށެވެ.

އެމަނިކުފާނު ވިދާޅުވީ މި އަދަދުތަކަށް ބަލާއިރު ރާއްޖޭގެ ތައުލީމީ ނިޒާމުގައި ވަގުތީ ޓީޗަރުންގެ އަދަދު އެއް ދުވަހުން އަނެއް ދުވަހަށް ދަނީ އިތުރުވަމުން ކަމަށާއި މިކަމަށް އަވަސް ހައްލެއް ހޯދަން މަސައްކަތް ނުކޮށްފިނަމަ ތައުލީމީ ދާއިރާއަށް ބޭނުންވާ މުދައްރިސުންނާއި ތައުލީމީ މަންހަޖު ތަރައްގީ ކުރާނެ މީހުންނާއި އަދި ޕްރިންސިޕަލުން ރާއްޖެއިން ނުލިބުމުގެ ބިރު ވަރަށް ބޮޑު ކަމަށެވެ.

މިކަން މިގޮތަށް ދޫކޮށްލެވިއްޖެނަމަ ކުރިމަގުގެ ޖީލަކީ އިލްމީ ގޮތުންނާއި، ވިސްނުމުގެ ގޮތުންނާއި ފަންނީ ގޮތުން މި ބޭނުންވާފަދަ އީޖާދީ ވިސްނުމުގެ އަހުލުވެރި ބަޔަކަށް ނުވުމަކީ ވަރަށް އެކަށީގެންވާ ކަމެއް ކަމަށް ރައީސް ސޯލިހު ވިދާޅުވި އެވެ.

ރައީސް ވިދާޅުވީ ގަބޫލުކުރެވޭގޮތުގައި ރާއްޖޭގެ ތައުލީމީ ދާއިރާގައި ހުރި މިފަދަ މައްސަލަތަކާމެދު އިލްމީ ދިރާސާތަކެއް އެބަ ހަދަންޖެހޭ ކަމަށާއި ތައުލީމީ ދާއިރާއަށް މީހުން ޝައުގުވެރިނުވާ ސަބަބުތަކަކީ ކޮބައިކަން ސާފުކޮށް އެނގޭނީ އިލްމީ ގޮތެއްގައި އެކަންކަން ހޯދައި ބަލައިގެން ކަމަށެވެ.