ލޯންޗުން ކަނޑަށް ވެއްޓުނު ކުއްޖާ ހޯދުން މެދުކަނޑާލައިފި

މި މަހުގެ 16 ވަނަ ދުވަހު މާލެ އިން ފުރައިގެން ވ. ފުލިދުއަށް ދަތުރުކުރި "ޑްރީމް ލޯންޗުން" ކަނޑަށް ވެއްޓި ގެއްލުނު ހަތަރު އަހަރުގެ ކުޑަ ފިރިހެން ކުއްޖާ ހޯދުމުގެ މަސައްކަތް އެމްއެންޑީއެފުން ވަގުތީ ގޮތުން މެދުކަނޑާލައިފިއެވެ.

އެމްއެންޑީއެފުން މިއަދު ބުނީ އެ ކުއްޖާ ހޯދުމަށް ކަނޑާއި ވައިގެ މަގުން ބޮޑު ސަރަހައްދެއް ބަލާފައިވާ ކަމަށާއި ނަމަވެސް ކުއްޖާގެ އެއްވެސް ހިލަމެއް ވެފައިނުވާ ކަމަށެވެ.

އެގޮތުން, ކަނޑާއި ވައިގެ މަގުން, 4706 އަކަ ނޯޓިކަލް މޭލުގެ ސަރަހައްދެއް ބަލާފައިވާ ކަމަށް އެމްއެންޑީއެފުން ވަނީ ބުނެފައެވެ.

ލޯންޗް އަނބުރާލަން އުޅުމުގެ ތެރޭގައި ތިން މީހަކު ކަނޑަށް ވެއްޓުނެވެ. ވެއްޓުނު ތިން މީހުންގެ ތެރޭގައި ހިމެނެނީ އަންހެނަކާއި ކުޑަކުއްޖެއްގެ އިތުރުން ފިރިހެނެކެވެ.

ކަނޑަށް ވެއްޓުނު 33 އަހަރުގެ މަރިޔަމް ނާހިދާ ފެނުނު އިރު ވެސް ވަނީ ނިޔާވެފަ އެވެ. ކަނޑަށް ގެއްލިފައިވަނީ އޭނާގެ އުމުރުން ހަތަރު އަހަރުގެ ދަރިފުޅެވެ.