ބާސާ އެއްވަރުވިއިރު ރެއާލް ތާވަލުގެ އެއްވަނައަށް ޖެހިލައިފި

ލަލީގާގައި ރޭ ބާސާ އާއި އަލަވޭސް ބައްދަލުކުރި މެޗު 1 - 1 ން އެއްވަރުވެގެން ނިމުނުއިރު އެލްޗޭ ބަލިކޮށް ރެއާލް މެޑްރިޑް ލީގު ތާވަލުގެ އެއްވަނައަށް ޖެހިލައިފި އެވެ.

ރެއާލާއި އެލްޗޭ ބައްދަލުކުރި މެޗު ނިމުނީ ވިނީޝިއަސް ޖޫނިއާގެ ގޯލުތަކާއެކު 2 - 1 ން ރެއާލް މޮޅުވެގެންނެވެ. އެންމެ ފުރަތަމަ މެޗުގައި ލަނޑުޖަހާ ލީޑު ނެގީ ރެއާލުންނެވެ. ވިނީޝިއަސް ރެއާލްގެ ދެލަނޑުވެސް ޖެހިއިރު އެލްޗޭގެ ހަމައެކަނި ގޯލު އެޓީމަށް ކާމިޔާބުކޮށްދިނީ ޕެރޭ މިލާ އެވެ.

ބާސާގެ ކޯޗުކަމުން ރޮނާލްޑް ކޫމަން ވަކިކުރުމަށް ފަހު ބާސާ އިން ކުޅުނު ފުރަތަމަ މެޗުގައި އެޓީމުވަނީ އަލަވޭސްއާ އެއްވަރުވެފަ އެވެ. އެ ޓީމަށް ލީޑު ނަގައިދިނީ ނެދަލޭންޑްސްގެ މެމްފިސް ޑިޕާއީ އެވެ.

މިއީ މިމެޗުގައި ބާސާއިން ޖެހި ހަމައެކަނި ލަނޑެވެ. އެކަމަކު، ބާސާއަށް ހެދުނު ގޯހެއްގެ ފައިދާނަގައި އަލަވޭސްއިން ވަނީ މެޗުގެ ނަތީޖާ ހަމަކޮށްފަ އެވެ. މިލަނޑު އަލަވޭސްގެ ލުއިސް ރިއޯހާ ޖަހައިދިނީ މެޗުގެ 52 މިނެޓުގަ އެވެ.

ބާސާގެ ފޯވަޑް ސާޖިއޯ އަގުއޭރޯ ވަނީ ޗެސްޓް ޑިސްކޮމްފޯޓްވެގެން (މެޔަށް އުދަނގޫވެގެން) ހޮސްޕިޓަލަށް ގެންގޮސްފަ އެވެ. ކާޑިއަކް ޓެސްޓްތަކެއް ކުރުމަށް އޭނާ ހޮސްޕިޓަލުގައި ބޭއްވި ކަމަށް ބާސާއިން ބުނެފައިވެ އެވެ.