އަންނަ އަހަރު ފުލުހުން ބޮޑީ ކެމެރާ ބޭނުންކުރަން ފަށަނީ

ސީންތަކަށް ދާއިރު ފުލުހުންގެ ގައިގައި ހަރުކޮށްގެން ބޭނުން ކުރާ ބޮޑީ ކެމް ނުވަތަ "ބޮޑީ ވޯން ކެމެރާ" އަންނަ އަހަރު ޖެނުއަރީ މަހުން ފެށިގެން ފުލުހުން ބޭނުންކުރަން ފަށާނެ ކަމަށް ކޮމިޝަނާ އޮފް ޕޮލިސް މުހައްމަދު ހަމީދު ވިދާޅުވެއްޖެ އެވެ.

ސީޕީ ހަމީދު ވިދާޅުވީ ފުލުހުން އިންސާނީ ވަސީލަތްތައް ބޭނުން ކުރަނީ އެންމެ ރަނގަޅަށްތޯ ބެލުމަށް ދިރާސާއެއް ކުރުމުގެ މަސައްކަތް ކުރަމުންދާ ކަމަށާއި ބައެއް ފުލުހުންގެ ފަރާތުން މިހާރު މަދުން ނަމަވެސް މައްސަލަތައް ފެންނަ ކަމަށެވެ.

އެހެންނަމަވެސް ބޮޑީ ވޯން ކެމެރާ ބޭނުން ކުރަން ފެށުނީމައި އެ މައްސަލަ ވެސް ހައްލުވާނެ ކަމަށް ސީޕީ ވިދާޅުވި އެވެ.

ސީޕީ އިތުރަށް ވިދާޅުވީ ފުލުހުން ބޭނުން ކުރާ ވަސީލަތްތަކާއި، އަމަލުކުރަމުން އަންނަ އުސޫލުތަކަށް ބަދަލު ގެންނާނެކަމަށާއި ރައްޔިތުންނާއި ގާތުން ހިދުމަތް ދިނުމަކީ ފުލުހުންގެ އަމާޒު ކަމަށެވެ.

ފުލުހުންގެ އޮޕަރޭޝަންތަކަށް ބޮޑީ ކެމެރާ ހޯދަން މިއަހަރުގެ ބަޖެޓުގައި ވެސް ހިމަނައިފައިވާއިރު މިދިޔަ އޮކްޓޯބަރު މަހުގައިވެސް 200 ބޮޑީ ކެމެރާ ގަނެދޭނެ ބަޔަކު ހޯދަން އިއުލާނު ކޮށްފައިވެ އެވެ.