ފަނޑިޔާރަކު ވިހެއުމުން ޗުއްޓީ ލިބޭ އިސްލާހެއް ހުށައަޅައިފި

ފަނޑިޔާރަކު ވިހެއުމުން ޗުއްޓީ ލިބޭގޮތަށް ފަނޑިޔާރުންގެ ގާނޫނަށް ބަދަލު ގެނައުމަށް މަޖިލީހަށް މިއަދު އިސްލާހެއް ހުށައަޅައިފި އެވެ.

ބިލް މަޖިލީހަށް ތައާރަފްކޮށް މިއަދުގެ ޖަލްސާގައި ވަނީ ބިލްގެ ފުރަތަމަ ކިޔުން އިއްވިއިރު މި ބިލް މަޖިލީހަށް ހުށަހެޅުއްވީ ސަރުކާރުގެ ފަރާތުން އެމްޑީޕީގެ ކަނޑިތީމު ދާއިރާގެ މެންބަރު އަބްދުﷲ ޝަހީމް އަބްދުލްހަކީމް އެވެ.

މަޖިލީހަށް މިއަދު ހުށަހެޅުނު އިސްލާހުގައިވަނީ ފަނޑިޔާރަކު ވިހައިފިނަމަ އެފަނޑިޔާރަކަށް 6 މަހުގެ ޗުއްޓީއެއް ލިބޭގޮތަށެވެ. އަދި ހަމައެއާއެކު ފަނޑިޔާރެއްގެ އަންހެނުން ވިހައިފިނަމަ ފިރިހެން ފަނޑިޔާރުންނަށް ވެސް އެއް މަހުގެ ޗުއްޓީއެއް ލިބޭ ގޮތަށް އިސްލާހު ވަނީ މަޖިލީހަށް ހުށަހެޅިފަ އެވެ.

އެންމެ ފުރަތަމަ މުވައްޒަފަކު ވިހައިފިނަމަ އެ މުވައްޒަފަކަށް 6 މަސް އަދި ފިރިމީހާއަށް 1 މަހުގެ ޗުއްޓީއެއް ލިބޭ ގޮތަށް އަމަލުކުރަން ފެށީ 2019 ވަނަ އަހަރުގެ މާޗުމަހު އެވެ. އެއީ ސިވިލް ސާވިސްގެ އިދާރާތަކާއި ސަރުކާރު ހިއްސާވާ ކުންފުނިތަކާއި އަދި ދައުލަތުގެ ބައެއް އެހެން އިދާރާތަކުގަ އެވެ.

މިބަދަލު ގެނެސް ފަނޑިޔާރުންގެ ގާނޫނު އިސްލާހުކުރަން ހުށަހަޅާފައިވަނީ ޖުޑީޝަލް ސާވިސް ކޮމިޝަނުން ބަންޑާރަނައިބުގެ އޮފީހުގައި އެދިފައި ވަނިކޮށެވެ.