ގެވެށި އަނިޔާއަށް ހޭލުންތެރި ކުރުވުމުގެ ސެޝަންތަކެއް ފިއްލަދޫގައި ފަށައިފި

މިނިސްޓްރީ އޮފް ޖެންޑަރ, ފެމިލީ އެންޑް ސޯޝަލް ސާރވިސްގެ ފަރާތުން ގެވެށި އަނިޔާއާއި ގުޅޭގޮތުން މީހުން ހޭލުންތެރި ކުރުވުމުގެ ސެޝަންތަކެއް ހއ.ފިއްލަދޫގައި ފަށައިފިއެވެ.

ޖެންޑާއިން ބުނީ މިއީ މަހުގެ 27 އިން 29 ގެ ނިޔަލަށް ކުރިއަށް ގެންދެވޭ ސެޝަންތަކެކެވެ. ސެޝަންތައް ހާއްސަ ކޮށްފައިވަނީ ފިއްލަދޫ ސްކޫލްގެ ގުރޭޑް 6 ން 10 ބެލެނިވެރިންނަށެވެ. ޖެންޑަރ މިނިސްޓްރީން ހާމަކޮށްފައިވާ ގޮތުގައި ކުޑަކުދިންނަށް ކުރާ އަނިޔާ އަދި ކުޑަކުދިންގެ ހައްގުތައް ރައްކާތެރިކުރުމުގައި ގާނޫނާއި ގުޅޭގޮތުން މައުލޫމާތު ހިއްސާކުރެވޭނެއެވެ.

އަދި ގެވެށި އަނިޔާ ހުއްޓުވުމާއި ގެވެށި ގުޅުމުގެ މުހިއްމު ކަމުގެ އިތުރުން ކުދީން ބެލެހެއްޓުމުގައި ބެލެނިވެރީން ސަމާލުވާންޖެހޭ ކަންކަންވެސް ހިއްސާ ކުރެވޭނެ ކަމަށް މިނިސްޓްރީން ހާމަކުރެއެވެ.

ޖެންޑަރ މިނިސްޓްރީގެ ފަރާތުން ނ.ފޮއްދޫ ގައި ވެސް ވަނީ ގެވެށި އަނިޔާއަށް ހޭލުންތެރި ކުރުވުމުގެ ސެޝަންތަކެއް ފަށާފައެވެ.