ސިއްހީ ކުއްލި ނުރައްކަލުގެ ހާލަތު އިތުރުކޮށްފި

އާއްމު ސިއްހަތުގެ ކުއްލި ނުރައްކަލުގެ ހާލަތު އަނެއްކާވެސް އިތުރުކޮށްފި އެވެ. މިމުއްދަތު އަލުން އިތުރުކޮށްފައިވަނީ މިމަހުގެ ނިޔަލަށެވެ.

ހެލްތް މިނިސްޓަރު އަހްމަދު ނަސީމުގެ ސޮޔާއެކު އިއްޔެ ނެރުއްވި ގަރާރުގައިވާ ގޮތުން މިމަހު 30ގެ ނިޔަލަށް ކުއްލި ހާލަތުގެ މުއްދަތު ދަންމާލަން ނިންމާފައިވާ ކަމަށެވެ.

އެގަރާރުގައިވާ ގޮތުގައި މިނިސްޓަރު މިގޮތަށް ނިންމާފައިވަނީ އަދިވެސް ފުޅާގޮތެއްގައި ރާއްޖޭގައި ކޮވިޑް ފެތުރުމުގެ ނުރައްކާ އޮތުމުން އެނުރައްކާ ކުޑަކުރުމަށް ހާއްސަ ފިޔަވަޅު އަޅަންޖެހޭ ކަމަށް ޑިރެކްޓާ ޖެނެރަލް އޮފް ޕަބްލިކް ހެލްތް މައިމޫނާ އަބޫބަކުރު ލަފާދެއްވުމުން ކަމަށެވެ.

އެންމެ ފުރަތަމަ ކޮވިޑް ރައްކާތެރިވުމަށް ފިޔަވަޅު އެޅުމުގެ ގޮތުން ކުއްލި ނުރައްކަލުގެ ހާލަތު އިއުލާންކުރީ މިދިޔަ އަހަރުގެ މާޗު 12 ގަ އެވެ. އެއަށްފަހު ކޮންމެ މަހަކު މިމުއްދަތު އިތުރުކުރަމުން އަންނައިރު މިހާރުވެސް ރާއްޖޭއިން ކޮންމެ ދުވަހަކުވެސް ޕޮޒިޓިވްވާ މިންވަރު މައްޗެވެ. މާލެ ސަރަހައްދުން މަދުނަމަވެސް އަތޮޅު ތެރެއިން ކޮންމެ ދުވަހަކުވެސް ގިނަ އަދަދެއްގެ ބަޔަކު އަންނަނީ ބައްޔަށް ޕޮޒިޓިވްވަމުންނެވެ.