twitterviber whatsapp telegramfacebookyoutube instagram
29th March 2024

ވެމްކޯއިން ޔޫތް މިނިސްޓްރީއާ ގުޅިގެން 29 ޒުވާނުން ތަމްރީނު ކުރަނީ

ނަބީލާ އިސްމާޢީލް
Dec 8, 2021

ޒުވާނުންނަށް މަސައްކަތުގެ މާހައުލުގައި ތިބެގެން ތަމްރީނާއި ތަޖުރިބާ ހޯދުމުގެ ފުރުސަތު ފަހިކޮށްދިނުމުގެ ބޭނުމުގައި ވޭސްޓް މެނޭޖްމަންޓް ކޯޕަރޭޝަން (ވެމްކޯ)އިން ހާއްސަ އެޕްރެންޓެސްޝިޕް ޕްރޮގްރާމެއް ފަށަން ނިންމައިފިއެވެ.

އެގޮތުން ވެމްކޯއިން ވަނީ ޔޫތު މިނިސްޓްރީން އިސްނަގައިގެން ކުރިއަށް ގެންދާ ނެޝަނަލް އެޕްރެންޓިސްޝިޕް ޕްރޮގްރާމްގައި ބައިވެރިވެ އެކަމާ ގުޅޭ އެމްއޯޔޫއެއްގައި މިއަދު ވަނީ ސޮއިކޮށްފައެވެ.


އެ އެމްއޯޔޫގައި ޔޫތު މިނިސްޓްރީގެ ފަރާތުން ސޮއި ކުރެއްވީ ސްޓޭޓް މިނިސްޓަރ ހުސެއިން އިސްމާއީލް އެވެ. ވެމްކޯގެ ފަރާތުން ސޮއިކުރެއްވީ އެ ކުންފުނީގެ މެނޭޖިންގ ޑައިރެކްޓަރ އާދަމް މުހައްމަދެވެ.

ނެޝަނަލް އެޕްރެންޓިސްޝިޕް ޕްރޮގްރާމްގެ ދަށުން ޒުވާނުން ތަމްރީނުކުރުމަށް ވެފައިވާ މި އެއްބަސްވުމުގެ ދަށުން ތަމްރީން ޕްރޮގްރާމުގައި ބައިވެރިވާން 29 ފުރުސަތު ހުޅުވާލުމަށް ނިންމާފައިވާ ކަމަށް ވެމްކޯ އިން ބުނެ އެެވެ.

މި ތަމްރީން ޕްރޮގްރާމްތައް ހިންގާނީ މޯލްޑިވްސް ނެޝަނަލް ސްކިލްސް ޑިވެލޮޕްމެންޓް އޮތޯރިޓީގެ ނެޝަނަލް ކޮމްޕިޓެންސީ ސްޓެންޑަޑްތަކަށް ފެތޭ ގޮތަށެވެ.



އެޕްރެންޓިސްޝިޕް ޕްރޮގްރާމްގައި ޒުވާނުން ތަމްރީނުކުރާނީ ކުރިމަތިލާފައިވާ ދާއިރާއަކާ ގުޅޭ ގޮތުން އަމަލީ ތަޖުރިބާ ވެސް ދީގެންނެވެ. މި ޕްރޮގްރާމް ނިންމާ ޒުވާނުންނަށް ދިވެހިރާއްޖޭގެ ގައުމީ ސަނަދުގެ އޮނިގަނޑުގެ ލެވެލް ތިނެއްގެ ސެޓްފިކެޓް ލިބޭނެއެވެ.

ވެމްކޯއިން ޒުވާނުން ތަމްރީނު ކުރާ ދާއިރާތަކުގެ ތެރޭގައި ހިމެނެނީ ސެޓްފިކެޓް ތިނެކުން ކޭޝިއަރިން އާއި، ވެލްޑިން ޓެކްނިކްސްގެ އިތުރުން އިންވެންޓަރީ މެނޭޖްމަންޓެވެ. އަދި ހެވީ ވެހިކަލް އޮޕަރޭޝަންސް، މެރިން މެކޭނިކްގެ އިތުރުން އޮޓޯމޯޓިވް މެއިންޓެނަންސްގެ ދާއިރާއިން ޒުވާނުން ތަމްރީނު ކުރާނެއެވެ.

މި ތަމްރީނުގައި ބައިވެރިވާ ފަރާތްތަކަށް ކޮންމެ މަހަކު 5،000ރގެ އެލަވަންސެއް ދިނުމަށް ވެސް ނިންމާފައި ވެއެވެ. އަދި ޕްރޮގްރާމް ފުރިހަމަކުރުމުން ވެމްކޯއިން ވަޒީފާގެ ފުރުސަތު ވެސް ފަހިވާނެއެވެ.

Kulhudhuffushi Online
Hikifinifenmaage
Maalihaa Magu
H.Dh. Kulhudhuffushi
Tel: 6528355, 7978355