ބަހާދަރު ބޯޓް ނައިފަރު ތޮށިގަނޑުގައި ޖެހި ގެއްލުންވެއްޖެ

ކުޅުދުއްފުއްޓާ މާލެއާއި ދެމެދު ދަތުރު ކުރާ ކުޅުދުއްފުށީ މިތުރު ކޮމްޕެނީގެ ބަހާދަރު ބޯޓް ޅ.ނައިފަރު ބަނދަރަށް ކައިރިކުރަނިކޮށް ގިޔަރަށް މައްސަލައެއް ދިމާވެ، ކޮންޓްރޯލް ނުކުރެވިގެން ގޮސް ތޮށިގަނޑުގައި ޖެހި ގެއްލުންވެއްޖެއެވެ.

ރޭ 9 ޖަހާކަން ހާއިރު ހިނގި މި ހާދިސާގައި ބޯޓްގެ ކުރީކޮޅު އެއްގަމު ތޮށިގަނޑުގައި ޖެހުމުގެ ސަބަބުން މައްޔާ ބިނދި ބޯޓްގެ ކުރީކޮޅަށް ވަނީ ބޮޑު ގެއްލުމެއް ލިބިފައެވެ.

އެ ބޯޓުގެ މުވައްޒަފަކު ކޭއޯއަށް މައުލޫމާތު ދެމުން ބުނީ ބޯޓު މި ވަގުތު އޮތީ މާލޭގައި ކަމަށާއި މިއަދު 14:00 ގައި ކުޅުދުއްފުއްޓަށް ފުރާނެ ކަމަށެވެ. ނަމަވެސް އެއްވެސް މުދަލެއް މި ދަތުރުގައި ބޯޓަށް ލޯޑު ނުކުރާނެ ކަމަށެވެ.

މި ހާދިސާގައި ބޯޓްގައި ތިބި އެއްވެސް މީހަކަށް އަނިޔާއެއް ނުވެ އެވެ.