އެހެން ގައުމުތަކުގެ އެހީތެރިކަން ބައެއް މީހުންނަށް އަސުރުމާ ދިޔަ ބޮއެގެންވެސް ހަޖަމުވާނެ ކަމެއްނޫން: ޔާސިރު

ރާއްޖެއަށް ކުރިމަތިވެފައިވާ އެންމެ ބޮޑުމައްސަލައަކީ މަސްތުވާތަކެތީގެ މައްސަލަ ކަމަށާއި މި ފަދަ ބޮޑެތި މައްސަލަތަކުގެ ހައްލު ހޯދަން އެހެން ގައުމެއްގެ އެހީތެރިކަން ލިބުމަކީ ބައެއް ފަރާތްތަކަށް "އަސުރުމާ ދިޔަ ބޮއެގެންވެސް ހަޖަމުވާނެ ކަމެއްނޫން" ކަމަށް ކުޅުދުއްފުށީ އުތުރު ދާއިރާގެ މަޖިލިސް މެންބަރު ޔާސިރު އަބްދުއްލަތީފް ވިދާޅުވެއްޖެއެވެ.

ޔާސިރު މިހެން ވިދާޅުވެ މިއަދު ކުރެއްވި ޓްވީޓެއްގައި އިތުރަށް ވިދާޅުވީ އެހެން ގައުމެއްގެ އެހީތެރިކަމާއި ނުލާ އުޅެވޭ ގައުމެއް ނެތް ކަމަށެވެ.

އެހެން ޤައުމެއްގެ އެހީތެރިކަމާއި ނުލާ އުޅެވޭ ޤައުމެއް ނެތް. ރާއްޖޭގެ އެންމެ ބޮޑު އެއް މައްސަލައަކީ މަސްތުވާތަކެތީގެ މައްސަލަ، މިފަދަ ބޮޑެތި މައްސަލަތަކަށް ހައްލުހޯދަން އެހެން ޤައުމެއްގެ އެހީތެރިކަން ލިބުމަކީ ބައެއް ބޭފުޅުންނަށް އަސުރުމާ ދިޔަ ބޮއެގެންވެސް ހަޖަމުވާނެ ކަމެއްނޫން

— Yasir Abdul Latheef (@YasirLathyf) December 19, 2021

އިދިކޮޅު ޕްރޮގްރެސިވް ކޯލިޝަނުން އިސްނަގައިގެން އަންނަނީ، ރާއްޖޭގައި ތިބި އިންޑިއާ ސިފައިން ބާލަން ގޮވާލާ "އިންޑިއާ މިލިޓަރީ އައުޓް" ނަމުގައި ކެމްޕޭނެއް ހިންގަމުންނެވެ. އަދި މި ކެމްޕެއިންގައި އިންޑިއާގެ އަސްކަރިއްޔާއިން ރާއްޖޭގައި ތިބުމާ ގުޅޭ ގޮތުން ރައްޔިތުން ދެކޭ ގޮތް ބެލުމަށް، ރައްޔިތުންގެ ފެންނަ ނުފެންނަ ވޯޓެއް ނަގަން އިދިކޮޅު ލީޑަރު އަދި ކުރީގެ ރައީސް އަބްދުﷲ ޔާމީން އަބްދުލްގައްޔޫމް ވަނީ ގޮވައިލައްވާފަ އެވެ.

މި ކެމްޕެއިން ފުޅާކުރުމަށް އެ ކޯލިޝަނުން މިހާރު އަންނަނީ އަތޮޅުތެރަށްވެސް ދަތުރު ކުރަމުންނެވެ.