މަކުނުދޫއާއެކު 6 ރަށެއްގައި އެއާޕޯޓް އަޅާނެ ބަޔަކު ހޯދަނީ

ހދ. މަކުނުދޫ ހިމެނޭގޮތަށް ރާއްޖޭގެ 6 ސަރަހައްދެއްގައި ޑޮމެސްޓިކް އެއާޕޯޓް ތަރައްގީކޮށްދޭނެ ފަރާތްތައް ހޯދުމަށް ޕްލޭނިން މިނިސްޓްރީން އިއުލާންކޮށްފި އެވެ.

ޕްލޭނިން މިނިސްޓްރީން އާންމުކުރި ގެޒެޓްވާގޮތުން ކްރޮސް-ސަބްސިޑީގެ ގޮތުގައި ފަތުރުވެރިކަމުގެ ބޭނުމަށް ރަށް ނުވަތަ ބިން ނުވަތަ ފަޅު ކުއްޔަށް ދިނުމާބެހޭ ގަވާއިދުގެ ދަށުން 6 ރަށެއްގައި ޑޮމެސްޓިކް އެއާޕޯޓްތައް ތަރައްގީކުރުމަށް ނުވަތަ ތަރައްގީ ކުރުމަށް ފައިނޭންސް ކުރުމަށް ޝައުޤުވެރިވާ ފަރާތްތަކަށް ވަނީ އެފުރުސަތު ހުޅުވާލާފަ އެވެ.

ޑޮމެސްޓިކް އެއާޕޯޓް ތަރައްގީކުރާ 6 ރަށާއި އެއާޕޯޓު ތަރައްގީކުރުމަށް ހިނގާނެކަމަށް އަންދާޒާކުރާ ޖުމްލަ އަދަދު:

1. ހދ. މަކުނުދޫ - 23.3 މިލިއަން ޑޮލަރު

2. ށ. ބިލަތްފަހި - 23.6 މިލިއަން ޑޮލަރު

3. ބ. ތުޅާދޫ - 21.9 މިލިއަން ޑޮލަރު

4. ތ. ވިލުފުށި - 33.3 މިލިއަން ޑޮލަރު

5. ފ. މަގޫދޫ - 8.2 މިލިއަން ޑޮލަރު

6. ރ. އަތޮޅު ދެކުނުބިތުގައި (ރަށް އަދި ކަނޑައެޅިފައެއް ނުވޭ) - 23.6 މިލިއަން ޑޮލަރު

ޕްލޭނިން މިނިސްޓްރީން ހާމަކުރާގޮތުގައި ކޮންމެ އެއާޕޯޓަކީ ވެސް ވަކި މަޝްރޫއެއްކަމުން ޝައުގުވެރިކަން ފާޅުކުރުމުގައި ތަރައްގީ ކުރަނީ ނުވަތަ ފައިނޭންސް ކުރަނީ ކޮން އެއާޕޯޓު މަޝްރޫއަކަށްކަން ބަޔާންކުރަންވާނެ އެވެ.

އެމިނިސްޓްރީން ބުނިގޮތުގައި ޝައުގުވެރިކަށް ފާޅުކުރުމުގައި ހަމައެކަނި ފައިނޭންސް ކުރާނަމަ، އެންމެ ދަށްވެގެން ހުށަހެޅޭނެ އަދަދަކީ ފަސް މިލިއަން އެމެރިކާ ޑޮލަރުކަމަށާއި ޝައުގުވެރިކަށް ފާޅުކުރުމުގައި، މުޅި އެއާޕޯޓް ތަރައްގީ ކުރުމަށް ނުވަތަ ފައިނޭންސް ކުރުމަށް ވެސް ހުށަހެޅިދާނެކަމަށް އެމިނިސްޓްރީގެ ގެޒެޓްގައިވެ އެވެ.

އެއާޕޯޓް ތަރައްގީކުރުމަށް ނުވަތަ ފައިނޭންސް ކުރުމަށް ހުށަހަޅާ އިންވެސްޓްމަންޓުގެ އަދަދު އެ މަޝްރޫއެއްގެ މުގާބިލުގައި، ފަތުރުވެރިކަމަށް ކުއްޔަށް ދޫކުރާނެ ރަށް ނުވަތަ ބިން ނުވަތަ ފަޅުގެ އެކްއިޒިޝަން ކޮސްޓާއި، އެ ތަނެއްގެ ބިމު ކުލީގެ ގޮތުގައި ކަނޑައެޅޭ ފައިސާގެ އަދަދާ ކަނޑައަޅައިދެވޭނެކަމަށް އެމިނިސްޓްރީން ހާމަކޮށްފައިވެ އެވެ.

ބިޑްކުރުމުގެ ދައުވަތަކާ ނުލައި ސަރުކާރަށް ޕްރޮޕޯޒަލް ހުށަހެޅުމުގެ އުސޫލު (އަންސޮލިސިޓަޑް ޕްރޮޕޯޒަލްސް ޕޮލިސީ) ގެ ދަށުން، ޝައުގުވެރިކަން ފާޅުކޮށް ހުށަހަޅާނީ، މިނިސްޓްރީ އޮފް އިކޮނޮމިކް ޑިވެލޮޕްމަންޓަށެވެ. އަދި އީމެއިލުން ނަމަ ފޮނުވާނީ [email protected] އަށެވެ.

ޝައުގުވެރިކަން ފާޅުކޮށް ހުށަހެޅުމުގައި، އަންސޮލިސިޓަޑް ޕްރޮޕޯޒަލްސް ޕޮލިސީ އެޕްލިކޭޝަން ފޯމު ފުރިހަމަކޮށްފައި، އެ ފޯމު ހުށަހަޅަންވާނެ އެވެ.