ދުވާލެއްގެ މައްޗަށް ފަތުރުވެރިން އަންނަ އަދަދު އިތުރު ވެއްޖެ

އާ އަހަރާއެކު ދުވާލެއްގެ މައްޗަށް ރާއްޖެ އަންނަ ފަތުރުވެރިންގެ އަދަދު އިތުރު ވެފައިވާކަމަށް ޓޫރިޒަމް މިނިސްޓްރީގެ ތަފާސް ހިސާބުތަކުން ދައްކައިފި އެވެ.

ތަފާސް ހިސާބުތައް ދައްކާ ގޮތުން މި އަހަރު ފުރަތަމަ ފަސް ދުވަހަށް ބަލާއިރު އެއްވްރެޖުކޮށް ދުވާލެއްގެ މައްޗަށް އަންނަ ޓޫރިސްޓުންގެ ނަމްބަރަކީ 4،900 ޓޫރިސްޓުން އެވެ.

މި އަހަރަށް ބަލާއިރު ރާއްޖޭގައި އެވްރެޖު ގޮތެއްގައި ޓޫރިސްޓުން މަޑު ކުރާ މުއްދަތު ނުވަތަ އެވްރެޖު ސްޓޭ ވެސް ވަނީ އިތުރުވެފަ އެވެ. މިދިޔަ އަހަރު 8.7 ދުވަހުގައި މި އަދަދު ހުރިނަމަވެސް މިހާރު ނުވަ ދުވަހަށް އިތުރުވެފަ އެވެ. މިއީ ހޮލިޑޭގެ ސަބަބުން އައި ކުރިއެރުމެއް ކަމަށް ބެލެވެ އެވެ.

ޓޫރިސްޓުންގެ ޑެއިލީ އެރައިވަލްސް އިތުރުވުމާއެކު ފުރަތަމަ ފަސް ދުވަހު އައިސްފައިވާ ޓޫރިސްޓުންގެ ޖުމުލަ އަދަދު ވެސް ވަނީ އިތުރުވެ އެވެ. މިދިޔަ އަހަރުގެ ފުރަތަމަ ފަސް ދުވަހު ރާއްޖެ އަށް އައިސްފައިވަނީ 15،680 ޓޫރިސްޓުންނެވެ. ނަމަވެސް މި އަހަރުގެ ފުރަތަމަ ފަސް ދުވަހަށް ބަލާނަމަ 24،527 ޓޫރިސްޓުން އައިސްފައިވެ އެވެ. މި އަދަދަކީ 56 ޕަސެންޓުގެ އިތުރުވުމެކެވެ.