ދިވެހި ރުފިޔާގެ އަގު ހިފަހައްޓަން މި އަހަރު ފިޔަވަޅު އަޅަން ފަށާނަން: ރައީސް

ދިވެހި ރުފިޔާގެ އަގު ހިފެހެއްޓުމަށް އަޅަން ޖެހޭ ފިޔަވަޅުތައް މި އަހަރު ތެރޭގައި އަޅަން ފަށާނެ ކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެއެވެ.

ރައްޔިތުންގެ މަޖްލިސް ހުޅުވުމަށް މިއަދު ބޭއްވި ޖަލްސާގައި، ރިޔާސީ ބަޔާން އިއްވަވަމުން ރައީސް ވިދާޅުވީ ހަމައެހެންމެ މި އަހަރު އެންމެ ބާރަށް ކުރިއަރާނެކަމަށް ބެލެވޭ މުޅި ދުނިޔޭގެ ފަސް އިޤްތިޞާދުގެ ތެރޭގައި ރާއްޖެ ހިމެނޭ ކަމަށެވެ.

އެގޮތުން ސަރުކާރުގެ އަންދާޒާ އަކީ މިހިނގާ 2022 ވަނަ އަހަރު ރާއްޖޭގެ އުފެއްދުންތެރިކަން 12 އިންސައްތައިގެ ކުރިއެރުމެއް ހޯދުން ކަމަށާއި އަދި މިއަހަރު ޖުމްލަ 1.6 މިލިއަން ފަތުރުވެރިން ރާއްޖެ ޒިޔާރަތް ކުރުން ކަމަށެވެ.

ފާއިތުވީ 2021 ވަނަ އަހަރު ރާއްޖޭގެ ފަތުރުވެރިކަމުގައި ހިފި އަމާޒަށް ވުރެ މަތިން ހާސިލްކުރެވިގެން ދިޔަކަން ރައީސް ފާހަގަ ކުރެއްވި އެވެ. އެގޮތިން އެއް މިލިއަން ފަތުރުވެރިންނަށް އަމާޒު ހިފިނަމަވެސް، ޖުމްލަ 3.1 މިލިއަނަށްވުރެ ގިނަ ފަތުރުވެރިން ރާއްޖެ ޒިޔާރަތް ކުރިއެވެ.

ރައީސް އިތުރަށް ވިދާޅުވީ މިދިޔަ އަހަރު ނިމުނު އިރު ދައުލަތުގެ ރަސްމީ ރިޒާވްގެ ގޮތުގައި 2.791 މިލިއަން ޑޮލަރު ހުރި ކަމަށެވެ. އަދި މި އަހަރު ތެރޭގައި ބޭރު ފައިސާގެ ބާޒާރާ ގުޅޭ ޤާނޫނީ އޮނިގަނޑަށް ބަދަލު ގެނެވޭނެ ކަމަށް ވިދާޅުވިއެވެ.