ފެނުމުގެ ނުކުޅެދުންތެރިކަން ހުންނަ ދަރިވަރުންނަށް ޚާއްސަ އެޕެއް ތައާރަފް ކުރަނީ

ފެނުމުގެ ނުކުޅެދުންތެރިކަން ހުންނަ ކުދިންނަށް ޚާއްސަ އެޕެއް ވަރަށް އަވަހަށް ތައާރަފް ކުރާނެކަމަށް އެޑިއުކޭޝަން މިނިސްޓަރު ޑރ. އައިޝަތު އަލީ ވިދާޅުވެއްޖެއެވެ.

ދައުލަތުގެ މީޑިއާއަށް ދެއްވި އިންޓަވިއުއެއްގައު މިނިސްޓަރު ވިދާޅުވީ މި އެޕްލިކޭޝަނަކީ ފެނުމުގެ ނުކުޅެދުންތެރިކަން ހުންނަ ކުދިންނަށް އަޑު ބޭނުންކޮށްގެން ކިޔަވައިދޭން ތައްޔާރުކުރާ އެޕެއްކަމަށެވެ.

އަދި އެ އެޕް ހެދުމުގެ މަސައްކަތް މިހާރު ހަލުވި ސްޕީޑެއްގައި ކުރިއަށް ދާކަމަށާއި ވަރަށް އަވަސް މުސްތަގްބަލެއްގައި އެ އެޕް އިފްތިތާހު ކުރެވޭނެ ކަމަށް މިނިސްޓަރު ވިދާޅުވިއެވެ. އެޕަށް ދީފައިވަނީ ނަމަކީ "ޝާމިލް އަޑު" އެވެ.

އިންޓަވިއުގައި ތައުލީމީ ދާއިރާގެ ކުރިއެރުމަށް ސަރުކާރުން ކޮށްފައިވާ ކަންތައްތަކަށް ވެސް އަލިއަޅުވައިލެއްވިއެވެ. އެގޮތުން ސްކޫލެއް ނެތް ތިން ރަށެއްގައި ސްކޫލު އަޅައި ސެޓެލައިޓު މެދުވެރިކޮށް އެ ސްކޫލްތަކުގައި ކިޔަވާދޭން މިއަހަރު ވަނީ ފަށައިފައެވެ. އެއީ ވ. ތިނަދޫއާއި ބ. ފެހެންދޫ އަދި ވ. ރަކީދޫއެވެ.

އެރަށްތަކުގެ ދަރިވަރުން މީގެކުރިން ތައުލީމު ހާސިލުކުރަން އެހެން ރަށަކަށް ދާންޖެހެއެވެ. ނަމަވެސް ސެޓެލައިޓް ސްކޫލާއެކު ހުޅުމާލޭ ރެހެންދި ސްކޫލްގެ ޓީޗަރުން މެދުވެރިކޮށް އެ ތިން ރަށުގެ ދަރިވަރުންނަށް އެކުދިންގެ ރަށުގައި ތިބެގެން މިހާރު އަންނަނީ ކިޔަވައިދެމުންނެވެ.