މަސްވެރިންނަށް ހާއްސަ އެޕެއް ނެރެނީ

މަސްވެރިންނަށް ހާއްސަ އެޕެއް މިއަހަރު ކުރީކޮޅު ތައާރަފްކުރާނެކަމަށް މިފްކޯގެ މެނޭޖިން ޑިރެކަޓަރު އިސްމާއީލް ފައުޒީ ވިދާޅުވެއްޖެއެވެ.

ދައުލަތުގެ މީޑިއާއަށް ދެއްވި އިންޓަވިއުއެއްގައި މި އެޕު މެދުވެރިކޮށް މިފްކޯގެ ވަސީލަތްތަކުގައި ޖާގަހުރި މިންވަރު ފެންނާނެކަމަށާއި އެހެންކަމުން ދެން ޖާގައޮތް މިންވަރު ބަލަން މިފްކޯގެ އެކި ސެންޓަރުތަކަށް ގުޅާކަށް ނުޖެހޭނެކަމަށެވެ.

މީގެ އިތުރުން އެޕާއެކު މަސްވެރިންގެ އެކައުންޓަށް ވަގުތުން ފައިސާ ޖަމާވާނެކަމަށާއި ތިމާވެއްޓާ ރަހުމަތްތެރި ގޮތަކަށް މިފްކޯގެ ބިލްތަށްވެސް އެޕް މެދުވެރިކޮށް ބަލާލެވޭނެކަމަށެވެ. އަދި މަސްވެރިންނަށް އިތުރު ހިދުމަތެއް ފޯރުކޮށްދިންނަމަ އެ ހިދުމަތުގެ ތަފްސީލުވެސް މި އެޕުން ފެންނާނެކަމަށް އޭނާ ވިދާޅުވިއެވެ.

މީގެ އިތުރުން ހުޅުމީދޫ އާއި ކޫއްޑޫ މަސްފެކްޓްރީގައި އާ ސްޓޯރޭޖް ސްޕޭސްތަކެއް ގާއިމްކުރުމުގެ މަސައްކަތް ވަރަށް އަވަހަށް ފެށޭނެކަމަށް ފައުޒީ ވިދާޅުވިއެވެ.

މަސްވެރިން ބާނާ މަސް ތާޒާކަމާއެކު ގިނަ ދުވަހަށް ދެމެހެއްޓުމަށް ރާއްޖޭގެ އެކި ރަށްރަށުގައި 22 އައިސްޕްލާންޓުގެ މަސައްކަތް ވެސް މިއަހަރުތެރޭ ފެށޭނެކަމަށް ފައުޒީ ވިދާޅުވިއެވެ.