ނޮޅިވަރަމުން ޕޮޒިޓިވްވި މީހުންގެ އަދަދު 264 އަށް، އެކްޓިވް 183 ކޭސް

ނޮޅިވަރަމުން މިދިޔަ ޖެނުއަރީމަހު 06 ވަނަ ދުވަހުން ފެށިގެން ކޮވިޑް ކޭސްތައް ފެންނަމުން އެރަށުން މިހާތަނަށް 264 މީހުން ބައްޔަށް ޕޮޒިޓިވް ވެއްޖެ އެވެ.

ނޮޅިވަރަމް ސިއްހީ މަރުކަޒުގެ ޒިންމާދާރު ވެރިޔާ ޝާފިއު މުހައްމަދު ކޭއޯއަށް ވިދާޅުވީ ބަލި ޖެހުނު މީހުންގެ ތެރެއިން 60 އަހަރުގެ ފިރިހެނަކު އިތުރު ފަރުވާއަށް ހުޅުމާލެ ފެސިލިޓީއަށް ފޮނުވާލަން ޖެހުނުކަމަށެވެ. މިވަގުތު އެރަށުގެ އެކްޓިވް ކޭސްތަކުގެ އަދަދުވެސް އުޅެނީ 100 މަތީގައެވެ. އެގޮތުން މިވަގުތު ބަލި ޖެހިފައި 183 މީހުން އެބަތިއްބެވެމ

އެރަށުން ފުރަތަމަ ޕޮޒިޓިވްވެފައިވަނީ ޖެނުއަރީ 1 ވަނަ ދުވަހު މާލެއިން އެރަށް ދަތުރުކުރި އުމުރުން 63 އަހަރުގެ އަންހެނެކެވެ. ޝާފިއު ވިދާޅުވީ މިހާރުވެސް ރަށުގައި ކޭސްތައް އިތުރުވަމުން ދާކަމަށާއި މިހާރު ފެނިފައިވާ ކޭސްތަކާއި ގުޅުން ނެތް މީހުންވެސް ޕޮޒިޓިވްވަމުން ދާކަމަށެވެ.

ޝާފިއު ކޭއޯއަށް މީގެކުރިން ވިދާޅުވީ ޕޮޒިޓިވްވެފައިވާ މީހުންގެ ތެރޭގައި އެއްވެސް ޓްރެވެލް ހިސްޓްރީއެއް ނެތް މީހުންވެސް ރަށުތެރެއިން ޕޮޒިޓިވްވެފައިވާކަމަށާއި ރަށުތެރޭގައި ބަލި އުޅުމުގެ ފުރުސަތު ވަރަށް ބޮޑު ކަމަށެވެ.

ބަލި ޖެހުނު މީހުންގެ ތެރެއިން ރަނގަޅުވެފައިވަނީ 81 މީހެކެވެ.