ޓީޗަރުންގެ މުސާރައިގެ އޮނިގަނޑު ނެރެނީ

ތައުލީމީ ދައިރާގައި މަސައްކަތް ކުރާ މުވައްޒަފުންގެ މުސާރަ ބޮޑުކޮށް އާ އޮނިގަނޑު ވަރަށް އަވަހަށް ހާމަ ކުރާނެ ކަމަށް ނެޝަނަލް ޕޭ ކޮމިޝަނުން ބުނެފި އެވެ.

ޓީޗަރުންގެ މުސާރަ ބޮޑުކުރާނެ ކަމަށް ރައްޔިތުންގެ މަޖިލިސް މިއަހަރަށް ހުޅުވުމަށް މިމަހުގެ ތިންވަނަ ދުވަހު ބޭއްވި ޖަލްސާގައި ރިޔާސީ ބަޔާން އިއްވަވަމުން ރައީސް ސޯލިހް ވަނީ ވިދާޅުވެފައެވެ.

އެގޮތުން އަންނަ މޭ މަހު ތައުލީމީ ދާއިރާގައި މަސައްކަތް ކުރާ މުވުައްޒަފުންގެ މުސާރަ ބޮޑުކުރާނެ ކަމަށް ރައީސް ވިދާޅުވި އެވެ.

ޕޭ ކޮމިޝަނުން ބުނީ މުސާރައިގެ އައު އޮނިގަނޑު ހެދުމުގެ މަސައްކަތް ކަމާ ގުޅޭ އިދާރާތަކާ ގުޅިގެން ކުރިއަށްދާ ކަމަށެވެ. އެ މަސައްކަތް ވަރަށް އަވަހަށް ނިންމާލުމަށް ފަހު މުސާރައިގެ ކުރިއެރުން ލިބޭ ގޮތުގެ މައުލޫމާތު ވަރަށް އަވަހަށް ހާމަކުރާނެ ކަމަށްވެސް ކޮމިޝަނުން ބުނެ އެވެ.

ބަދަލުތަކާއެކު ގުރެޖުއޭޓް ލެވެލްގެ ސެކަންޑަރީ ޓީޗަރެއްގެ މުސާރަ އިތުރުގަޑިއާ ނުލައި 12،628 ރުފިޔާ އިން 19،740 ރުފިޔާއަށް ބޮޑުވެގެންދާނެ އެވެ. ރައީސް ވިދާޅުވި ގޮތުގައި އެއީ 56 ޕަސެންޓްގެ ކުރިއެރުމެކެވެ.