ރިސޯޓް ތަރައްގީ ކުރުމަށް ހުޅުވާލި ރަށްތަކަށް ތަރުހީބު ބޮޑު: ޓޫރިޒަމް މިިނިސްޓްރީ

އަލަށް ރިސޯޓު ހަދަން އިއުލާނު ކުރި ރަަށްތަކަށް ލިބޭ ތަރުހީބު ބޮޑު ކަމަަށް ޓޫރިޒަމް މިނިސްޓްރީން ބުނެފި އެވެ.

ރިސޯޓުތަކެއް ތަރައްގީ ކުރަން ދެވަނަ ފަހަރަށް މި ސަރުކާރުން ރަށްތަކެއް އިއުލާނުކުރީ މިދިޔަ އަހަރު ދުބާއީގައި ކުރިއަށް ދިޔަ "ދުބާއީ އެކްސްޕޯ"ގައި އޮތް މޯލްޑިވިއަން އިންވެސްމަންޓް ފޯރަމްގައި މިދިޔަ އޮކްޓޯބަރު މަހުގެ 31 ވަނަ ދުވަހުއެވެ. އެފަހަރު 18 ރަށެއް އިއުލާނު ކުރި އެވެ.

ރިސޯޓު ހަދަން އަލަށް ނެރޭ ރަށްތަކާ ބެހޭ ގޮތުން ޓޫރިޒަމް މިނިސްޓްރީން ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމެއްގައި އެ މިނިސްޓްރީގެ ޑެޕިއުޓީ ޑިރެކްޓަރު އަލީ ޝިނާން ވިދާޅުވީ ރިސޯޓު ހަދަން ދޫކުރި ރަށްތަކަށް އިންކުއަރީ ލިބެމުންދާ ކަމަށެވެ. އަދި މި ފަހަރު ކުރީ ފަހަރުތަކަށް ވުރެ ތަރުހީބު ބޮޑުކަން އޭނާ ފާހަގަކުރެއްވި އެވެ.

ރިސޯޓް ހެދުމަށް ހުޅުވާލި 18 ރަށުގެ ބީލަމުގެ މުއްތަދު އަންނަ މާޗު މަހަށް އިތުރުކޮށްފައިވާ ކަމަށް މީގެ ކުރިން އެ މިނިސްޓްރީން ނެރުނު އިއުލާނެއްގައި ބުނެފައި ވެއެވެ. ބީލަން ހުޅުވާލުމަށްފަހު ށ. އަތޮޅުގެ ތިން ރަށް ލިސްޓަށް ސަރުކާރުން ފަހުން އިތުރުކުރި އެެވެ. އެގޮތުން އިތުރުކުރި ރަށްތަަކަކީ ށ. ދިގުރަށާއި މެދުރަށް އަދި އެ އަތޮޅު މައިރަށެވެ.

ރަށްތަކަށް ބީލަން ހުށަހެޅުމަށް އިތުރު ވަގުތު ދިނީ ކޮވިޑުގެ އާ ވެރިއަންޓް އޮމިކުރޮންއާ ގުޅިގެން ގައުމުތަކުން އަޅަމުންދާ ފިޔަވަޅުތަކުގެ ސަބަބުން ދަތުރުފަތުރުކުރުމާއި ވިޔަފާރީގެ ބައެއް ކަންކަމަށް ހުރަސް އެޅިފައިވާތީ އިންވެސްޓަރުންނަށް އިތުރު ފުރުސަތު ދިނުމުގެ ގޮތުން ކަމަށް މިނިސްޓްރީން ބުނެ އެވެ.

އަލަށް ރިސޯޓު ހަދަން ރަށްތަކެއް ނެރުނުއިރު 118 ރަށެއް އެބައޮތެވެ. މީގެތެރޭގައި 23 ފަޅެއް ވެސް ހިމެނެ އެވެ.