ހުރިހާ ރަށެއްގައި ލެބޯޓްރީގެ ހިދުމަތް ދޭން ފަށަނީ

ރާއްޖޭގެ ހުރިހާ ރަށަކުން ލެބޯޓްރީގެ ހިދުމަތް ލިބޭނެގޮތް އިންތިޒާމްކުރުމުގެ މަސައްކަތް ފަށްޓަވާފައިވާ ކަމަށް ހެލްތު މިނިސްޓަރ އަހްމަދު ނަސީމް ވިދާޅުވެއްޖެއެވެ.

ދައުލަތުގެ މީޑީއާއަށް ދެއްވި އިންޓަވިއުއެއްގައި މިނިސްޓަރު ނަސީމް ވިދާޅުވީ ރާއްޖޭގެ ސިއްޙީ ނިޒާމްގެ ކަންކަން ކުރިއަރުވައި ތަރައްގީކުރުމުގެ މަސައްކަތް ކުރައްވަމުން ގެންދަވަނީ ވަކި ތަރުތީބަކުންކަމަށެވެ.

މިގޮތުން ކުރިއަށްދާ އެންމެ މުހިންމު އެއް މަޝްރޫޢެއްގެ ގޮތުގައި މިނިސްޓަރ ފާހަގަކުރެއްވީ ރާއްޖޭގެ ހުރިހާ ސަރަހައްދެއްގެ ސިއްހީ ހިދުމަތްދޭ ތަންތަނުގައި ތަހްލީލްކުރެވޭނެ ނުވަތަ ލެބޯޓްރީގެ ހިދުމަތް ލިބޭނެ އިންތިޒާމް ފަހިކުރުމުގެ ހާއްސަ ޕްރޮގްރާމެއް ފަށައިގެން ކުރިއަށް ގެންދިއުމެވެ.

ރާއްޖޭގެ ހުރިހާ ސަރަހަރައްދަކަށް ލެބޯޓްރީގެ ޚިދުމަތް ލިބޭނެ އިންތިޒާމް ހަމަޖެއްސުމުގެ މަސައްކަތް ކުރަމުން އަންނައިރު، މިވަގުތު އަތޮޅުތަކުގައި 90އަށް ވުރެ ގިނަ ލެބޯޓްރީން ހިދުމަތް އަންނަނީ ފޯރުކޮށްދެމުންނެވެ.