މި ފޮޓޯއިން ޕްރިންސިޕަލާއި ދަރިވަރުންނާ އޮތް ގާތް ގުޅުން

މި ފޮޓޯ ކުޅުދުއްފުށި އޮންލައިނުގައި ޖެހި ހިސާބުން ވަރަށް ގިނަ ބައެއްގެ ސަމާލުކަން ފޮޓޯއަށް ހުއްޓުނެވެ. ބައެއް ފަރާތްތަކުން ކޭއޯއަށް ވަކިން މެސެޖްކޮށްފައިވެސް މި ފޮޓޯ ހިތްގައިމުކަން ހިއްސާކުރި އެވެ. އާދެ، ފޮޓޯއިން ފެނިގެންދަނީ ޕްރިންސިޕަލަކާއި ދަރިވަރެކެވެ. އޮތް، އޮންނަ ޖެހޭ ގާތް ގުޅުމެވެ.

ކުޅުދުއްފުށީގައި ބޭއްވި ފުރަތަމަ އިންޓަރ ސްކޫލް ފުޓްބޯޅަ މުބާރާތުގެ ފައިނަލް މެޗުން އަފީފުއްދީން މޮޅުވުމުން އެކަމުގެ އުފަލުގައި ބައިވެރިވެވަޑައިގެން، އެ ސްކޫލްގެ ޕްރިންސިޕަލް ނާސިހާ އިދުރީސް، ދަރިވަރުންނާއި އަތާއި އަތް ޖައްސަވާ އުފާކުރައްވާ މި މަންޒަރުން ގިނަ ބައެއްގެ ހިތް ފަތަހަ ކޮށްލި އެވެ.

މިއީ ރާއްޖޭގައި ވަރަށް މަދުން ނޫނީ ނުފެންނަ މަންޒަރެކެވެ. ގިނަ ފަހަރަށް ޕްރިންސިޕަލުން ވެފައި އޮންނަނީ ދަރިވަރުންނާ މާބޮޑު ގުޅުމެއް ނޯނާނެ ދަރިވަރުން ފޫހިވާ ބައެއްގެ ގޮތުގައި އެވެ. ނޫންނަމަ ބިރަކަށެވެ. ކޮންމެއަކަސް މި މަންޒަރުން އެ ވިސްނުން ބަދަލުކޮށްލަ އެވެ.

މި ފޮޓޯ ނެގި ކޭއޯގެ ސްޕޯޓްސް ޖާރނަލިސްޓް މުހައްމަދު އަހުމަދަށްވެސް މި މަންޒަރުން ތަފާތު އުފާވެރި އިހްސާސެއް ކުރުވީ ސަބަބެއް ނެތިއެއް ނޫނެވެ. މަދުން ނޫނީ ނުފެންނަ މި މަންޒަރުން އޭނާއަށްވެސް ފާހަގަވީ ޕްރިންސިޕަލާއި ދަރިވަރުންނާ އޮތް ގާތް ގުޅުމެވެ.

ސްކޫލް ކުޅޭ ކޮންމެ ދުވަހަކުވެސް ނާސިހާ ސްޓޭޑިއަމަށް ވަޑައިގެން ދަރިވަރުންގެ ތެރޭގައި އިންނަވައިގެން ވަރަށް ޖޯޝާއި ފޯރީގައި ދަރިވަރުންނަށް ސަޕޯޓްކުރާ މަންޒަރު ފެނެ އެވެ. ފައިނަލް މެޗު ކުޅުނު ހާއްސަ ދުވަހުވެސް ދަރިވަރުންގެ ތެރެއަށް ވަޑައިގެން އެ ކުދިންނާ ބައްދަލުކޮށް އުފަލުގައި ބައިވެރިވެ ހިތްވަރުދީ ސާބަސް ދެއްވާ މަންޒަރު ފެނުނެވެ.



މި ފޮޓޯއަށް ކޮމެންޓްކޮށް އެ ސްކޫލުގެ ބެލެނިވެރިޔަކު ބުނެފައިވަނީ، ނާސިހާއަކީ ހުރިހާ ދަރިވަރުންނާއި އަބަދުވެސް ގާތް ގުޅުން ބާއްވާ ފަރާތެއްގެ ގޮތުގައި ކަމަށެވެ. އަދި މީގެ އިތުރުން ބެލެނިވެރިންނާވެސް ނާސިހާ ގާތް ގުޅުމެއް ބާއްވާކަން އޭނާ ފާހަގަކޮށްފައިވެ އެވެ.

"ނާސިހާ އިދުރީސް ވަރުގެ ޕްރިންސިޕަލެއް ނުލިބޭނެ. އެހާ ހިތްހެޔޮ އެންމެންނާވެސް ގުޅޭ ފަރާތެއް އެއީ." އެހެން މީހަކު ކޮށްފައިވާ ކޮމެންޓެއްގައިވެ އެވެ.