ފޮރިން ސާވިސް މުވައްޒަފުންގެ މުސާރަ ކަނޑައެޅުން ފިނޭންސަށް ބަދަލުކޮށްފި

ފޮރިން ސާވިސްގެ މުވައްޒަފުންގެ މުސާރަ ކަނޑައެޅުން، ފިނޭންސް މިނިސްޓްރީއަށް ބަދަލު ކުރުމަށް ފޮރިން ސާވިސްގެ ބިލަށް ހުށަހަޅައިފައިވާ އިސްލާހު ރައްޔިތުންގެ މަޖިލީހުން ފާސްކޮށްފިއެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި މި ބިލު ފާސްކޮށްފައިވަނީ ވޯޓުގައި ބައިވެރިވެވަޑައިގެންނެވި 44 މެންބަރުންގެ އިއްތިފާގުންނެވެ.

ސަރުކާރުގެ ފަރާތުން ރައްޔިތުންގެ މަޖިލީހަށް މި ބިލު ހުށަހަޅައިފައިވަނީ ދުވާފަރު ދާއިރާގެ މެމްބަރު އިސްމާއިލް އަހުމަދެވެ. މި ބިލު ހާރިޖީ ކޮމިޓީން ދިރާސާކުރުމަށްފަހު، ކޮމިޓީން ނިންމައިފައިވަނީ މަޖިލީހަށް ބިލު ހުށަހެޅި ގޮތަށް ފާސްކުރުމަށެވެ.

މި އިސްލާހު ގެނައުމުގެ ކުރިން ފޮރިން މިނިސްޓްރީގެ މުވައްޒަފުންގެ މުސާރަ އާއި އިނާޔަތްތަކުގެ އޮނިގަނޑު ކަނޑައަޅަމުން އައީ ރައީސް އޮފީހުންނެވެ. އިސްލާހާއެކު ނެޝަނަލް ޕޭ ކޮމިޝަނުން ކަނޑައަޅާ މިންގަނޑުތަކާ އެއްގޮތްވާ ގޮތުން މަތީން އެ މަސައްކަތް ކުރަމުން އަންނާނީ ފިނޭންސް މިނިސްޓްރީންނެވެ.

ސިވިލް ސާވިސް އާ ވަކިކޮށް، ފޮރިން ސާވިސްގެ ނަމުގައި ވަކި ހިދުމަތެއް ގާއިމް ކޮށް، އެ ގާނޫނު ތަސްދީގުކޮށްފައިވަނީ މިދިޔަ ނޮވެންބަރު މަހުގެ 14 ވަނަ ދުވަހުއެވެ. އެހެންނަމަވެސް އެ ގާނޫނަށް އަމަލު ކުރަން ފަށާނީ އަންނަ މަހުގެ 14ގައެވެ.